തിരുവനന്തപുരം: തിരുവനന്തപുരത്ത് പ്രഭാത സവാരിക്കിറങ്ങിയ വയോധികൻ വാഹനാപകടത്തിൽ മരിച്ചു. 28 മൈൽ- ഇടമൺ നില റോഡിലാണ് അപകടം നടന്നത്. നാവായിക്കുളം സ്വദേശി തുളസീധരൻ പിള്ള (65)ആണ് മരിച്ചത്.
പെരിക്കോട്ടുകോണത്ത് വച്ച് അമിത വേഗത്തിൽ എത്തിയ ആൾട്ടോ കാർ തുളസീധരൻപിള്ളയെ ഇടിച്ച് തെറിപ്പിക്കുകയായിരുന്നു. ഇടിയുടെ ആഘാതത്തിൽ തുളസീധരൻ പിള്ള തെറിച്ചു സമീപത്തെ മതിലിൽ ഇടിച്ചു വീഴുകയായിരുന്നു. ഇടിയുടെ ആഘാതത്തിൽ തുളസീധരൻ പിള്ള സംഭവസ്ഥലത്ത് വച്ച് തന്നെ മരിച്ചിരുന്നു. ഇടിച്ച ശേഷം വാഹനം നിർത്താതെ പോകുകയായിരുന്നു.
തുടർന്ന് കല്ലമ്പലം പൊലീസ് സിസിടിവി ദൃശ്യങ്ങൾ കേന്ദ്രീകരിച്ചു നടത്തിയ അന്വേഷണത്തിലാണ് കാർ കണ്ടെത്തിയത്. പോത്തൻകോട് സ്വദേശി മാത്യു തോമസിന്റെ പേരിലാണ് കാർ ഉള്ളത്. സംഭവത്തിൽ ഇയാൾക്കെതിരെ പോലീസ് കേസ് രജിസ്റ്റർ ചെയ്തു.
