തിരുവനന്തപുരം: തുമ്പ സെന്റ് സേവ്യേഴ്സ് കോളേജ് മലയാളം & മാസ്സ് കമ്മ്യൂണിക്കേഷൻ വിഭാഗത്തിന്റെ സാഹിത്യകൂട്ടായ്മയായ മലയാളസമാജം പ്രശസ്ത നോവലിസ്റ്റ് വി.ഷിനിലാൽ ഉദ്ഘാടനം ചെയ്തു. മനുഷ്യപുരോഗതിയുടെ അടിസ്ഥാനം ഭാഷയാണെന്നും ഭാഷ ഇല്ലാതായാൽ മനുഷ്യർ ഒരുപാട് നൂറ്റാണ്ട് പിറകിലേക്ക് പോകുമെന്നും അദ്ദേഹം അഭിപ്രായപ്പെട്ടു.
അതുകൊണ്ട് ഭാഷാ വിദ്യാർത്ഥികൾ ഭാഷ നല്ല രീതിയിൽ കൈകാര്യം ചെയ്യേണ്ടതുണ്ടെന്നും അദ്ദേഹം ഓർമ്മപ്പെടുത്തി. മലയാളത്തിലെ പ്രശസ്ത നിരൂപകനും കോളേജ് പ്രിൻസിപ്പാളുമായ പ്രൊഫ.തോമസ് സ്കറിയ അധ്യക്ഷനായി. എഴുത്തുകാരുമായുള്ള സംവാദത്തിലൂടെ സർഗ്ഗാത്മകശേഷിയുള്ള തലമുറ ഉണ്ടായിവരുമെന്ന് അദ്ദേഹം പറഞ്ഞു.
മലയാളം & മാസ്സ് കമ്മ്യൂണിക്കേഷൻ വിഭാഗം മേധാവി ഡോ.വർഗ്ഗീസ് ജോസഫ് സ്വാഗതം ആശംസിച്ച ചടങ്ങിൽ ഒന്നാം വർഷ വിദ്യാർത്ഥിനി ഹർഷിണി നന്ദി പറഞ്ഞു. സമ്മേളനത്തോടനുബന്ധിച്ചു വിദ്യാർത്ഥികളുടെ കലാപരിപാടികളും നടന്നു.
