തിരുവനന്തപുരം: തിരുവനന്തപുരം പോത്തൻകോട് ഓടിക്കൊണ്ടിരുന്ന ടിപ്പർ ലോറിക്ക് തീ പിടിച്ചു. ഇന്ന് ഉച്ചയ്ക്ക് 12 മണിയോടെയാണ് സംഭവം നടന്നത്. തലനാരിഴയ്ക്കാണ് വൻ അപകടം ഒഴിവായത്. പോത്തൻകോട് ജഗ്ഷൻ എത്തുന്നതിന് 200 മീറ്റർ മുമ്പാണ് ടിപ്പറിന് തീപിടിച്ചത്.
വിഴിഞ്ഞം പദ്ധതി പ്രദേശത്തേക്ക് പാറ കൊണ്ടുപോയ വാഹനത്തിനാണ് തീപിടിച്ചത്. പാറ കൊണ്ടുപോയി മടങ്ങി വന്ന ലോറി തിരികെ പാറ എടുക്കുവാൻ വേണ്ടി പോത്തൻകോട് പോകുന്ന വഴിക്കാണ് തീപിടിച്ചത്. വാഹനത്തിന്‍റെ എഞ്ചിനാണ് തീ പിടിച്ചത്. തീ പടരുന്നത് ശ്രദ്ധയിൽപ്പെട്ടതും ഡ്രൈവർ വാഹനം നിർത്തി പുറത്തിറങ്ങി രക്ഷപ്പെടുകയായിരുന്നു.
തുടർന്ന് ഡ്രൈവർ അരുൺ വാഹനത്തിൽ ഉണ്ടായിരുന്ന ഫയർ എക്സിറ്റിംഗ്യൂഷര്‍ ഉപയോഗിച്ച് തീയണയ്ക്കാൻ ശ്രമിച്ചു. പക്ഷെ തീ പെട്ടെന്ന് ആളിപ്പടരുകയായിരുന്നു. ഉടൻ തന്നെ കഴക്കൂട്ടം ഫയർ സ്റ്റേഷനിലെ രണ്ട് ഫയർ യൂണിറ്റുകള്‍ സ്ഥലത്തെത്തി തീയണച്ചു. ഷോ‍ർട്ട് സർക്യൂട്ടാണ് തീപിടുത്തതിന് കാരണമെന്നാണ് പ്രാഥമിക നിഗമനം.
