കൊച്ചി: പനമ്പള്ളി നഗറിൽ നവജാതശിശുവിനെ എറിഞ്ഞുകൊന്ന സംഭവത്തിൽ മറ്റൊരു വഴിത്തിരിവ്. സംഭവത്തിൽ യുവതിയുടെ ആൺ സുഹൃത്തിനെതിരേ പൊലീസ് കേസെടുത്തു. തൃശ്ശൂര് സ്വദേശിയായ റഫീക്കിനെതിരെയാണ് പൊലീസ് കേസെടുത്തത്. വിവാഹ വാഗ്ദാനം നൽകി ലൈംഗികമായി പീഡിപ്പിച്ചുവെന്ന പരാതിയിലാണ് കേസ് രജിസ്റ്റർ ചെയ്തത്.
മെയ് മൂന്നിനായിരുന്നു പനമ്പള്ളി നഗറിൽ നവജാതശിശുവിനെ യുവതി എറിഞ്ഞുകൊന്നത്. ശുചി മുറിയിൽ പ്രസവിച്ച യുവതി മണിക്കൂറുകൾക്കും കുഞ്ഞിനെ പൊതിഞ്ഞു റോഡിലേക്ക് വലിച്ചെറിയുകയായിരുന്നു. രാവിലെ അത് വഴി പോയ ശുചീകരണ തൊഴിലാളികളാണ് കുഞ്ഞിന്റെ മൃതദേഹം കണ്ടെത്തിയത്.
തുടർന്ന് പോലീസ് നടത്തിയ അന്വേഷണത്തിലാണ് അവിവാഹിതയായ യുവതിലേക്ക് എത്തിയത്. കുട്ടിയെ കൊലപ്പെടുത്തിയ യുവതി ഇപ്പോഴും ആരോഗ്യം വീണ്ടെടുത്തില്ല. മെഡിക്കൽ കോളേജിൽ ചികിത്സയിലാണ് ഇവർ.
