കോഴിക്കോട്: പന്തീരങ്കാവ് ഗാർഹിക പീഡനക്കേസിൽ പ്രതിയെ നാട്ടിലെത്തിക്കാനുള്ള ശ്രമങ്ങൾ ആരംഭിച്ച് പോലീസ്. നിലവിൽ രാഹുൽ ജർമനിയിൽ ആണെന്നാണ് വിവരം. ഇതിനായി ഇന്റർപോളിന്റെ സഹായം പോലീസ് തേടിയിരുക്കുകയാണ്. ഇതേതുടർന്ന് രാഹുൽ ഗോപാലിനായി ഇന്റർപോൾ ബ്ലൂ കോർണർ നോട്ടീസ് പുറത്തിറക്കി. അതിനിടെ പ്രതിയായ രാഹുലിന് ജർമ്മൻ പൗരത്വം ഇല്ലെന്നാണ് വ്യക്തമാകുന്നത്.
രാഹുലിനു നിലവിൽ ഇന്ത്യൻ പാസ്പോർട്ട് തന്നെയാണുള്ളതെന്നു കണ്ടെത്തി. ഇയാൾ ജര്‍മ്മൻ പൗരനാണെന്ന വാദം നുണയാണെന്നും പ്രത്യേക അന്വേഷണ സംഘം സ്ഥിരീകരിച്ചു. എന്നാൽ ഇതുവരെയും പ്രതിയെ കുറിച്ച് ഒരു വിവരവും ലഭിക്കാത്ത സാഹചര്യത്തിൽ രാഹുലിനെ കണ്ടെത്താന്‍ റെഡ് കോർണർ നോട്ടീസ് പുറപ്പെടുവിക്കാൻ സാധ്യതയുണ്ടെന്നാണ് വിവരം.
വിദേശത്തുള്ള ഏജന്‍സികൾ തന്നെ പ്രതിയെ അറസ്റ്റ് ചെയ്ത് നാട്ടിലെത്തിക്കാനുള്ള നടപടികൾ സ്വീകരിക്കും എന്നതാണ് റെഡ് കോർണർ നോട്ടീസ് കൊണ്ടുള്ള ഗുണം. എന്നാൽ ബ്ലൂ കോർണർ നോട്ടീസിന്‍റെ തുടർ നടപടികൾ ലഭിച്ചതിനു ശേഷമായിരിക്കും ബാക്കി കാര്യങ്ങൾ തീരുമാനിക്കുകയെന്ന് പോലീസ് അറിയിച്ചു.
