ഷൊർണൂർ: ട്രെയിൻ യാത്രക്കിടെ യുവതിക്ക് പാമ്പ് കടിയേറ്റതായി സംശയം. ആയുർവേദ ഡോക്ടർ ഗായത്രി (25)ക്കാണ് പാമ്പ് കടിയേറ്റതായി സംശയിക്കുന്നത്. തുടർന്ന് യുവതി ഷൊര്ണ്ണൂരിലെ സ്വകാര്യ ആശുപത്രിയില് ചികത്സ തേടി.
ഇന്ന് രാവിലെ ഏഴു മണിക്കാണ് സംഭവം നടന്നത്. നിലമ്പൂരിൽ നിന്നു ഷൊർണൂരിലേക്കു പോയ ട്രെയിനിലാണ് സംഭവം. ട്രെയിനിൻ്റെ ബർത്തിൽ കിടക്കുകയായിരുന്നു ഗായത്രി. ഇതിനിടയ്ക്ക് വല്ലപ്പുഴ എത്തുന്നതിനു മുൻപാണ് തന്നെ പാമ്പു കടിച്ചെന്ന് പറഞ്ഞു പുറത്തേക്ക് വന്നത്. ബർത്തിൽ പാമ്പുണ്ടെന്നും മറ്റ് യാത്രക്കാർ പാമ്പിനെ കണ്ടുവെന്നും യുവതി പറഞ്ഞു.
തുടർന്ന് ട്രെയിൻ നിർത്തി പരിശോധന നടത്തിയെങ്കിലും പാമ്പിനെ കണ്ടെത്താനായിട്ടില്ല. പാമ്പിനെ കണ്ടെന്ന് പറയുന്ന ബോഗി പൂട്ടിയ ശേഷം ട്രെയിൻ സർവീസ് തുടരുകയാണ്. പെരിന്തൽമണ്ണയിലെ സ്വകാര്യ ആശുപത്രിയിൽ പ്രവേശിപ്പിച്ച ഗായത്രി ഇപ്പോൾ നിരീക്ഷണത്തിലാണ്.
