കണ്ണൂര്: ആളൊഴിഞ്ഞ പറമ്പിൽ നിന്ന് വീണ്ടും സ്റ്റീൽ ബോംബുകൾ കണ്ടെടുത്തു. കണ്ണൂരാണ് സംഭവം. പൊലീസ് വ്യാപകമായി നടത്തിയ പരിശോധനയ്ക്കിടെയാണ് പറമ്പിൽ നിന്നും 2 സ്റ്റീൽ ബോംബുകൾ കണ്ടെത്തിയത്. എരഞ്ഞോളിയില് ബോംബ് പൊട്ടിത്തെറിച്ച് വയോധികന് മരിച്ച സംഭവത്തെ തുടർന്ന് ജില്ലയിൽ പൊലീസ് പരിശോധന കർശനമാക്കിയിരുന്നു.
കണ്ണൂര് കൂത്തുപറമ്പില് മാങ്ങാട്ടിടം ആമ്പിലാട് റോഡിലെ ആളൊഴിഞ്ഞ പറമ്പിലാണ് സ്റ്റീൽ ബോംബുകൾ കണ്ടെത്തിയത്. ചാക്കില് പൊതിഞ്ഞ് സൂക്ഷിച്ച നിലയിലായിലുന്നു. ബോംബുകൾ കണ്ടെത്തിയതിനു പിന്നാലെ നിർവീര്യമാക്കി.
ബോംബുകൾ ആരാണ് സൂക്ഷിച്ചതെന്ന് വ്യക്തമല്ല. തലശ്ശേരി, കൂത്തുപറമ്പ്, ന്യൂ മാഹി, പാനൂർ, കോളവല്ലൂർ മേഖലകളിലാണ് കൂടുതൽ പരിശോധന. പരിശോധന വരും ദിവസങ്ങളിലും തുടരുമെന്ന് പൊലീസ് അറിയിച്ചു.
