തിരുവനന്തപുരം: തുമ്പ സെൻറ് സേവിയേഴ്സ് കോളേജിൽ സർട്ടിഫിക്കറ്റ് വാങ്ങാൻ പോയ വിദ്യാർത്ഥിയെ നാല് വിദ്യാർത്ഥികൾ ചേർന്ന് ക്രൂരമായി മർദ്ദിച്ചു. കൊച്ചുവേളി സ്വദേശി ഫിനുവിനാണ് മർദ്ദനമേറ്റത്. സംഭവത്തിൽ ഫിനു കഴക്കൂട്ടം പോലീസിൽ പരാതി നൽകി.
ഇന്നലെയാണ് സംഭവം നടന്നത്. മൂന്നാം വർഷ ബികോം വിദ്യാർത്ഥികളായ ഹരി കാർത്തിക്, ബിനോയ്, റിനു, ജോയൽ എന്നിവർ സംഘം ചേർന്ന് മർദ്ദിക്കുകയായിരുന്നു എന്നാണ് പരാതിയിൽ പറയുന്നത്. കോളേജിൽനിന്ന് തന്റെ സർട്ടിഫിക്കറ്റ് വാങ്ങാൻ ആയിരുന്നു ഫിനു എത്തിയത്. അന്നേദിവസം കോളേജിൽ ഉണ്ടായിരുന്ന ഇവർ സംഘം ചേർന്ന് യാതൊരു പ്രകോപനവും കൂടാതെ ഫിനുവിനെ ആക്രമിക്കുകയും ഇത് കണ്ട് തടയാൻ ശ്രമിച്ച മൂന്നാം വർഷ വിദ്യാർത്ഥിനിയെ അധിക്രൂരമായി മർദിച്ചുവെന്നും കൂടാതെ സ്ത്രീത്വത്തെ തന്നെ അപമാനിക്കുന്ന തരത്തിൽ അസഭ്യം പറയുകയും ചെയ്തുവെന്നും പരാതിയിൽ പറയുന്നു.
മർദനത്തിൽ ഫിനുവിന്റെ നെഞ്ചിൽ മാരകായുധം കൊണ്ട് ആഴത്തിൽ മുറിവുണ്ടാകുകയും കൈയ്ക്ക് പരിക്കേൽക്കുകയും തലയുടെ പിൻഭാഗത്തും നെറ്റിയിലും ചതവ് പറ്റുകയും ചെയ്തു. ഫിനു കോളേജിലെ മുൻ എസ് എഫ് ഐ ചെയർമാനായിരുന്നു.
