ഡൽഹി: മൂന്നാം മോദി സർക്കാരിന്റെ ആദ്യ ബജറ്റിനെ പരിഹസിച്ച് പ്രതിപക്ഷനേതാവ് രാഹുൽ ഗാന്ധി. കേന്ദ്ര സർക്കാരിന്റെ കസേര രക്ഷിക്കാനുള്ള ബജറ്റാണ് ഇപ്പോൾ അവതരിപ്പിച്ചതെന്നാണ് രാഹുൽ ഗാന്ധി വിമർശിക്കുന്നത്. മാത്രമല്ല കോൺഗ്രസിന്റെ പ്രകടന പത്രികയുടെയും പഴയ ബജറ്റിന്റെയും കോപ്പിയടിയാണ് ഈ ബജറ്റെന്നും അദ്ദേഹം ആരോപിച്ചു. സമൂഹമാധ്യമമായ എക്സിലൂടെയാണ് രാഹുൽഗാന്ധിയുടെ പ്രതികരണം.
സാധാരണ ഇന്ത്യക്കാർക്ക് ആശ്വാസമില്ലാത്ത ബജറ്റാണിതെന്നും സഖ്യകക്ഷികളെ പ്രീണിപ്പിക്കുകയും മറ്റ് സംസ്ഥാനങ്ങളുടെ ചെലവിൽ അവർക്ക് പൊള്ളയായ വാഗ്ദാനങ്ങൾ നല്കുകയും ചെയ്യുകയാണ് ഈ ബജറ്റെന്നും രാഹുൽ പറഞ്ഞു.
അതെ സമയം ധനമന്ത്രി നിർമ്മല സീതാരാമനെ അഭിനന്ദിച്ച് പ്രധാനമന്ത്രി നരേന്ദ്രമോദി. വനിതാ പ്രാതിനിധ്യം ഉറപ്പിക്കുന്ന ബജറ്റാണ് നിർമല സീതാരാമൻ അവതരിപ്പിച്ചതെന്ന് മോദി പറഞ്ഞു. ടൂറിസം മേഖലയുടെ മുന്നേറ്റത്തിന് ബജറ്റിലെ പദ്ധതികൾ സഹായിക്കുമെന്നും മോദി അഭിപ്രായപ്പെട്ടു.
