കൊച്ചി: ജസ്റ്റിസ് ഹേമ കമ്മിറ്റി റിപ്പോർട്ട് പുറത്തുവിടുന്നത് സ്റ്റേ ചെയ്ത് ഹൈക്കോടതി. നിർമ്മാതാവ് സജി മോൻ പറയിൽ സമർപ്പിച്ച ഹർജിയെ തുടർന്നാണ് ഹൈക്കോടതി ഉത്തരവ്. റിപ്പോർട്ട് പുറത്തുവിടുന്നത് സ്വകാര്യതയെ ബാധിക്കുമെന്നും തടയണമെന്നുമാണ് ഹർജിയിൽ ആവശ്യപ്പെട്ടിരുന്നത്.
ഒരാഴ്ചത്തേയ്ക്കാണ് ഹൈക്കോടതി നടപടി. ജസ്റ്റിസ് ഹേമ കമ്മിറ്റി റിപ്പോര്‍ട്ട് ഇന്ന് പുറത്തുവിടാൻ സർക്കാർ തീരുമാനിച്ചിരുന്ന സാഹചര്യത്തിലാണ് കോടതി സ്റ്റേ ചെയ്തത്. ആളുകളുടെ പേര് വിവരങ്ങൾ പുറത്ത് പരാമർശിക്കാതെ വേണം റിപ്പോർട്ട് പുറത്തുവിടാൻ എന്നാണ് സർക്കാർ നിർദേശിച്ചിരുന്നത്. എന്നാൽ ആളുകളുടെ പേര് വിവരങ്ങൾ പുറത്ത് വിട്ടില്ലെങ്കിലും പലരിലേക്കും വിരൽ ചൂണ്ടുന്ന അവസ്ഥയാകുമെന്നും പ്രശസ്തിക്ക് വേണ്ടി മാത്രമുള്ള റിപ്പോർട്ടാണിതെന്നുമാണ് ഹർജിയിൽ പറഞ്ഞിരിക്കുന്നത്.
