തിരുവനന്തപുരം: നടനും സംവിധായകനുമായ ബാലചന്ദ്ര മേനോനെതിരെ ലൈംഗിക പീഡന പരാതി നല്കി നടി. 2007 ജനുവരിയാണ് കേസിനാസ്പദമായ സംഭവം നടന്നതെന്നാണ് നടിയുടെ മൊഴിയിൽ പറയുന്നത്.
ആലുവ സ്വദേശിനിയായ നടിയാണ് ബാലചന്ദ്ര മേനോനെതിരെ പ്രത്യേക അന്വേഷണ സംഘത്തിന് മുന്നിൽ പരാതി നൽകിയത്. ദേ ഇങ്ങോട്ട് നോക്ക്യേ എന്ന സിനിമ ഷൂട്ടിനിടെ ലൈംഗീകാതിക്രമം നടത്തിയെന്നാണ് പരാതിയിൽ പറയുന്നത്. ഭയന്നിട്ടാണ് ഇതുവരെ പരാതി നൽകാതിരുന്നതെന്നും പുറത്ത് പറഞ്ഞാൽ ചിത്രീകരിച്ച സിനിമാ രംഗങ്ങൾ ഒഴിവാക്കുമെന്ന് ഭീഷണിപ്പെടുത്തിയെന്നും നടി പറയുന്നു.
കൂടാതെ ഗ്രൂപ്പ് സെക്സിന് നിര്ബന്ധിച്ചുവെന്നും ഹോട്ടല് മുറിയില് കയറി വന്ന് ലൈംഗീക അതിക്രമം നടത്തിയെന്നും ആരോപണമുണ്ട്. തിരുവനന്തപുരത്തെ ഹോട്ടലില് വച്ചാണ് സംഭവം നടന്നത്. അതെ സമയം സംഭവത്തിൽ പ്രതികരണവുമായി ബാലചന്ദ്ര മേനോൻ രംഗത്തെത്തി. നടി ഉന്നയിച്ച ആരോപണം അടിസ്ഥാനരഹിതമാണെന്നും നിയമനടപടിക്കൊരുങ്ങുന്നുവെന്നുമാണ് ബാലചന്ദ്ര മേനോൻ പറയുന്നത്.
