തിരുവനന്തപുരം: സംസ്ഥാന ഫിഷറീസ് വകുപ്പിന്റെ മുതലപ്പൊഴി ഫിഷിങ് ഹാർബർ വികസന പദ്ധതി അംഗീകരിച്ചുകൊണ്ട് കേന്ദ്രസർക്കാർ ഉത്തരവായെന്ന് ഫിഷറീസ് വകുപ്പ് മന്ത്രി സജി ചെറിയാൻ. മുതലപ്പൊഴി ഫിഷിങ് ഹാർബർ പദ്ധതിക്കായുള്ള പ്രാരംഭ പഠനങ്ങളും മാതൃകാ പഠനവും വിവരശേഖരണവും നടത്തിയതും അതിനുള്ള ചെലവ് വഹിച്ചതും സംസ്ഥാന സർക്കാരാണെന്നും മന്ത്രി പറഞ്ഞു.
നിലവിലെ ഫിഷിങ് ഹാർബറിന്റെ രൂപകൽപ്പന കേന്ദ്ര ഏജൻസിയായ സെൻട്രൽ വാട്ടർ ആൻഡ് പവർ റിസർച്ച് സ്റ്റേഷനായിരുന്നു നടത്തിയത്. പക്ഷേ പൊഴിയിൽ അപകടങ്ങൾ പതിവായതിനെ തുടർന്നാണ് സംസ്ഥാന സർക്കാർ മുൻകൈയെടുത്ത് പ്രശ്നപരിഹാരത്തിനും ഫിഷിങ് ഹാർബർ വികസനത്തിനുമായി പഠനം നടത്തിയത്.
177 കോടി രൂപയുടെ പദ്ധതിയുടെ ചെലവ് 60:40 എന്ന തോതിൽ കേന്ദ്രവും സംസ്ഥാനവും പങ്കിടും. 70.80 കോടി രൂപയാണ് സംസ്ഥാന വിഹിതം. പദ്ധതി യാഥാർഥ്യമായാൽ 415 യന്ത്രബോട്ടുകൾക്ക് ദിവസവും തുറമുഖത്ത് എത്താം. ഇതുവഴി വർഷം 38,142 ടൺ മീൻ ഇറക്കുമതി ചെയ്യാനാകും. തീരത്തിന്റ ആഴം വർധിപ്പിച്ച് മത്സ്യബന്ധനത്തിന് കൂടുതൽ സൗകര്യമൊരുക്കും. പുലിമുട്ടിന്റെ നീളം 425 മീറ്റർ വർധിപ്പിക്കും.
റോഡ് നവീകരണം, പാർക്കിങ് ഏരിയ, ഡ്രെയിനേജ്, ലോഡിങ് ഏരിയ നവീകരണം,വാർഫ് വിപുലീകരണം, ലേല ഹാൾ, ഓവർഹെഡാട്ടർ ടാങ്ക് നിർമ്മാണം, വിശ്രമകേന്ദ്രം, കടകൾ, ഡോർമിറ്ററി, ഗേറ്റ്, ലാൻഡ്സ്കേപ്പിങ്, നിലവിലുള്ള ഘടനകളുടെ നവീകരണം, യാർഡ്ലൈറ്റിങ്, പ്രഷർ വാഷറുകൾ, ക്ലീനിങ് ഉപകരണങ്ങൾ നിരീക്ഷണ സംവിധാനം സ്ഥാപിക്കൽ, നാവിഗേഷൻ ലൈറ്റ്, മെക്കാനിക്കൽ കൺവെയർ സിസ്റ്റം, തുടങ്ങിയവയും യാഥാർഥ്യമാകും. തീരസംരക്ഷണവും ഉറപ്പാക്കുമെന്നും മന്ത്രി വ്യക്തമാക്കി.
