തിരുവനന്തപുരം: ജീവിതത്തില്‍ ആദ്യമായിട്ടാണ് സസ്‌പെന്ഷൻ കിട്ടുന്നതെന്ന് എൻ പ്രശാന്ത് ഐഎഎസ്. വാറോല കിട്ടിയ ശേഷം പ്രതികരിക്കാമെന്നാണ് എൻ പ്രശാന്ത് മാധ്യമങ്ങളോട് പറഞ്ഞത്. അഡീഷണൽ ചീഫ് സെക്രട്ടറിയെ അധിക്ഷേപിച്ചതിനാണ് അദ്ദേഹത്തിന് വകുപ്പുതല നടപടി നേരിടേണ്ടി വന്നത്.
ശരിയാണെന്ന് തോന്നുന്ന കാര്യങ്ങള്‍ പറയുന്നതില്‍ തെറ്റില്ലെന്നാണ് വിശ്വസിക്കുന്നതെന്ന് പ്രശാന്ത് പറഞ്ഞു. എല്ലാവരെയും സുഖിപ്പിച്ച് തനിക്ക് സംസാരിക്കാനാകില്ലെന്നും സ്‌കൂളിലോ കോളേജിലോ പഠിക്കുമ്പോള്‍ പോലും സസ്‌പെന്‍ഷന്‍ ലഭിച്ചിട്ടില്ലെന്നും അദ്ദേഹം പറഞ്ഞു.
ഭാഷാപ്രയോഗം നടത്താൻ എല്ലാവർക്കും അവകാശമുണ്ട്. ആരെയും വ്യക്തിപരമായി അധിക്ഷേപിച്ചിട്ടില്ല. എന്തെങ്കിലും തുറന്നു പറഞ്ഞാൽ കോർണർ ചെയ്യുന്നത് ശരിയല്ലെന്നും അദ്ദേഹം പറഞ്ഞു. കൂടാതെ ഉത്തരവ് കൈപ്പറ്റിയ ശേഷം കൂടുതല്‍ നടപടികളിലേക്ക് കടക്കുമെന്നും എൻ പ്രശാന്ത് വ്യക്തമാക്കി.
