തിരുവനന്തപുരം: തിരുവനന്തപുരം വിഴിഞ്ഞത്ത് തെരുവ് നായ ആക്രമണം രൂക്ഷം. തെരുവുനായയുടെ ആക്രമണത്തിൽ ഒരു വീട്ടിലെ 12 കോഴികളെ കടിച്ചുകൊന്നു, 7 ആടുകൾക്കും വളർത്തുനായകൾക്കും കടിയേൽക്കുകയും ചെയ്തു.
മുക്കോല നെല്ലിക്കുന്ന് പനവിളക്കോട് ഭാഗങ്ങളിലായി ഇന്നലെ ഉച്ചയോടെയാണ് തെരുവുനായയുടെ ആക്രമണം ഉണ്ടായത്. പ്രദേശവാസിയായ രതീഷിന്റെ വീട്ടിലെ 12 കോഴികൾ നായയുടെ കടിയേറ്റു ചത്തതായാണ് വിവരം.
വീട്ടുകാർ കടിയേൽക്കാതെ രക്ഷപ്പെട്ടു. കൂടാതെ കറവയുള്ള ഏഴ് ആടുകളെയും സമീപ വീടുകളിലെ വളർത്തു നായ്ക്കളേയും കടിച്ചു. പേ ബാധിച്ച നായയാണ് ആക്രമിച്ചതെന്നു സംശയിക്കുന്നതായി നാട്ടുകാർ പറഞ്ഞു. ആക്രമിച്ച നായയെ കണ്ടെത്തിയില്ല.
