തിരുവനന്തപുരം: തിരുവനന്തപുരത്ത് വാഷിംഗ് മെഷീന് തീപിടിച്ച് വീടിന് നാശനഷ്ടം. നെല്ലനാട് കാന്തലക്കോണത്താണ് സംഭവം. വള്ളിക്കാട് മധുസൂദനൻ നായർ പ്രീതകുമാരി ദമ്പതികളുടെ വീട്ടിലെ വാഷിംഗ് മെഷീനാണ് തീപിടിച്ചത്.
ഇന്നലെ ഉച്ചയോടെയാണ് സംഭവം നടന്നത്. ശുചിമുറിയിൽ പ്രവർത്തിച്ചുകൊണ്ടിരുന്ന വാഷിംഗ് മെഷീനിൽ നിന്നാണ് തീപടർന്നത്. പുക ഉയരുന്നത് കണ്ട വീട്ടുകാരാണ് വിവരം ഫയർഫോഴ്സിനെ അറിയിച്ചത്. പുക ഉയർന്ന ഉടൻ തന്നെ തീ ആളിപ്പടർന്നെന്നും ശുചിമുറിയിലേക്ക് തീപടർന്ന് കത്തിയെന്നും നാട്ടുകാർ പറഞ്ഞു.
ഒരു വർഷം മാത്രം പഴക്കമുള്ള ടോപ്പ് ലോഡ് വാഷിംഗ് മെഷീനാണ് തീപിടിച്ചത്. തുണികളും ബാത്ത്റുമിലുണ്ടായിരുന്ന സാധനങ്ങളും കത്തിപ്പോയി. ഷോർട്ട് സർക്യൂട്ടാകാം അപകട കാരണമെന്നാണ് പ്രാഥമിക നിഗമനം.
