തിരുവനന്തപുരം: തിരുവനന്തപുരം പെരിങ്ങമ്മലയിൽ കാട്ടുപോത്ത് ആക്രമണം. ഇന്നലെ രാത്രി 7.30 ഓടെയാണ് സംഭവം. റോഡിലുണ്ടായിരുന്ന ഓട്ടോറിക്ഷ കാട്ടുപോത്ത് ഇടിച്ചു മറിക്കുകയായിരുന്നു. കാട്ടുപോത്തിന്റെ ആക്രമണത്തിൽ രണ്ട് പേർക്ക് പരിക്കേറ്റു.
അപകടത്തിൽ ഓട്ടോ ഡ്രൈവർ അശ്വിൻ, യാത്രക്കാരനായ സനോജ് എന്നിവർക്കാണ് പരിക്കേറ്റത്. പെരിങ്ങമ്മല ഭാഗത്ത് നിന്നും വരികയായിരുന്ന ഓട്ടോറിക്ഷയ്ക്ക് നേരെയാണ് ആക്രമണം നടന്നത്. ഇടിയുടെ ആഘാതത്തിൽ ഓട്ടോറിക്ഷ തലകീഴായി മറിയുകയായിരുന്നു.
നാട്ടുകാർ ചേർന്നാണ് പരിക്കേറ്റവരെ ആശുപത്രിയിൽ പ്രവേശിപ്പിച്ചത്. ഇവരുടെ പരിക്ക് ഗുരുതരമല്ലെന്നാണ് പ്രാഥമിക വിവരം.
