തിരുവനന്തപുരം : വിശുദ്ധ റമദാൻ മാസത്തെ ആത്മീയ വിശുദ്ധിയുടെയും സാമൂഹിക ഉത്തരവാദിത്വത്തിന്റെയും മാസമായി സ്വീകരിച്ച് സമൂഹത്തിൽ ധാർമ്മിക മൂല്യങ്ങൾ ശക്തിപ്പെടുത്തണമെന്ന് വിസ്‌ഡം ഇസ്‌ലാമിക് യൂത്ത് ഓർഗനൈസേഷൻ തിരുവനന്തപുരം ജില്ലാ കമ്മിറ്റി സംഘടിപ്പിച്ച റമദാൻ തർബിയ സംഗമം അഭിപ്രായപ്പെട്ടു.
നോമ്പ് ആത്മനിയന്ത്രണവും സഹനശീലവും കരുണയും സാമൂഹിക ഐക്യവും വളർത്തുന്ന മഹത്തായ ആരാധനാകർമമായതിനാൽ യുവജനങ്ങൾ നോമ്പിന്റെ യഥാർത്ഥ സന്ദേശം ജീവിതത്തിൽ നടപ്പാക്കാൻ മുന്നോട്ട് വരണം. സമൂഹത്തിലെ ദാരിദ്ര്യവും ദുരിതവും അനുഭവിക്കുന്നവരോട് കരുണയും, കരുതലും പുലർത്തണം. നോമ്പ്കാലത്തെ സാമൂഹിക സേവന പ്രവർത്തനങ്ങൾ ശക്തിപ്പെടുത്താൻ യുവാക്കൾ മുന്നിട്ടിറങ്ങണം.
റമദാൻ മാസത്തെ ലഹരി വിരുദ്ധ ബോധവത്കരണത്തിനും മാനവിക മൂല്യങ്ങളുടെ പ്രചാരണത്തിനും ഉപയോഗപ്പെടുത്താൻ യുവജന സംഘടനകളും മത-സാമൂഹിക സംഘടനകളും രംഗത്തിറങ്ങണം. അതോടൊപ്പം നോമ്പ് കാലത്തെ വിപണിയിലെ വിലക്കയറ്റവും അനാവശ്യ ചൂഷണങ്ങളും നിയന്ത്രിക്കാൻ ബന്ധപ്പെട്ട അധികാരികൾ ശക്തമായ നടപടികൾ സ്വീകരിക്കണമെന്നും സംഗമം ആവശ്യപ്പെട്ടു.
ആലംകോട് ഹാരിസൺസ് പ്ലാസയിൽ സംഘടിപ്പിച്ച തർബിയ സംഗമം വിസ്‌ഡം യൂത്ത് സംസ്ഥാന വൈസ് പ്രസിഡന്റ് അബ്ദുറഹ്മാൻ ചുങ്കത്തറ ഉദ്ഘാടനം ചെയ്തു.
