ഡൽഹി: കേരളത്തിലും ബിജെപി സർക്കാരുണ്ടാക്കുമെന്നു പ്രധാനമന്ത്രി നരേന്ദ്ര മോദി. ബിജെപി ഡൽഹി ആസ്ഥാനത്തെ വിജയാഘോഷത്തിൽ പ്രസംഗിക്കവെയാണ് ഇക്കാര്യം പറഞ്ഞത്. ബിജെപി കേരളത്തിലും വിജയിക്കും. തിരശീലയ്ക്കു പിന്നിൽ കോൺഗ്രസും ഇടതുപക്ഷവും സഖ്യമുണ്ടാക്കുന്നതു കേരളവും കാണുന്നുണ്ടെന്നും അദ്ദേഹം പറഞ്ഞു.
തെരഞ്ഞെടുപ്പ് ഫലം രാജ്യത്ത് ജനാധിപത്യം വളരുന്നുവെന്നു സൂചിപ്പിക്കുന്നതാണ്. മാത്രമല്ല ന്യൂനപക്ഷങ്ങൾ ബിജെപിക്കൊപ്പമാണെന്നും ഗുജറാത്തിലും ഗോവയിലും ഇപ്പോൾ വടക്ക് കിഴക്കൻ സംസ്ഥാനങ്ങളിലും അതാണു വ്യക്തമാകുന്നതെന്നും അദ്ദേഹം പറഞ്ഞു. മേഘാലയ, നാഗാലാൻഡ്, ത്രിപുര എന്നിവിടങ്ങളിലെ ജനങ്ങളുടെ വോട്ട്, വികസനത്തിനും സ്ഥിരതയ്ക്കും വേണ്ടിയുള്ളതായിരിക്കുമെന്ന് ഉറപ്പു തരുന്നു. പഴയ ഗവൺമെന്റുകൾ വെല്ലുവിളികളിൽ നിന്നും ഓടിയകന്നിരുന്നു, എന്നാൽ ഈ ഗവൺമെന്റ് അതെല്ലാം ഏറ്റെടുക്കുമെന്നും പ്രധാനമന്ത്രി നരേന്ദ്ര മോദി വ്യക്തമാക്കി.
വിജയാഘോഷത്തിൽ പങ്കെടുക്കാൻ കേന്ദ്ര ആഭ്യന്തര മന്ത്രി അമിത് ഷാ, ബിജെപി ദേശീയ അധ്യക്ഷൻ ജെ. പി നദ്ദ തുടങ്ങിയവരും പാർട്ടി ആസ്ഥാനത്തുണ്ടായിരുന്നു. ആയിരക്കണക്കിനു പ്രവർത്തകരും ആഘോഷത്തിൽ പങ്കുചേർന്നു.
