തിരുവനന്തപുരം: നിരവധി ക്രിമിനൽ കേസുകളിൽ പ്രതിയായ തിരുവല്ലം സ്വദേശി ‘ഭായ്‘ എന്ന് വിളിക്കുന്ന ശ്രീജിത്ത് എന്നയാളെ 13.16 ഗ്രാം എം ഡി എം എയുമായി പിടിയിൽ. തിരുവനന്തപുരം എക്സൈസ് എൻഫോഴ്സ്മെന്റ് ആൻഡ് ആന്റി നാർക്കോട്ടിക് സ്പെഷ്യൽ സ്ക്വാഡ് സർക്കിൾ ഇൻസ്പെക്ടർ ബി.എൽ ഷിബുവിന്റെ നേതൃത്വത്തിലുള്ള സംഘമാണ് ഇന്നലെ രാത്രി കുമരിച്ചന്തഭാഗത്ത് വെച്ച് അറസ്റ്റ് ചെയ്തത്. എം ഡി എം എ കടത്തിക്കൊണ്ടുവന്ന ബൈക്ക് കസ്റ്റഡിയിലെടുത്തു. രാത്രി 12 മണിക്ക് ശേഷം ഈ മേഖലയിൽ ബൈക്കിൽ ചുറ്റി നടന്ന് മയക്കുമരുന്ന് കച്ചവടം നിർത്തുന്നതിൽ പ്രധാനിയാണ് ഇയാൾ.
ചെറുപ്പക്കാർ ഒരു പ്രത്യേക ‘കോഡ്’ ഇദ്ദേഹത്തിനോട് കൈമാറിയാൽ മാത്രമേ ഇയാൾ കച്ചവടം നടത്താറുള്ളൂ. എക്സൈസ് എൻഫോഴ്സ്മെന്റ് ആൻഡ് ആന്റി നാർക്കോട്ടിക് സ്പെഷ്യൽ സ്ക്വാഡ് ഷാഡോ ടീമിന്റെ കൃത്യമായ ഇടപെടൽ കാരണമാണ് ഇയാളെ പിടികൂടിയത്.
മുൻപൊരിക്കൽ എക്സൈസ് ടീം പരിശോധനയ്ക്ക് എത്തിയപ്പോൾ കത്തി സ്വയം കഴുത്തിൽ വച്ച് ഭീകരാന്തരീക്ഷം സൃഷ്ടിച്ച് രക്ഷപ്പെട്ടയാളാണ്, ഇപ്പോൾ എക്സൈസ് സ്പെഷ്യൽ സ്ക്വാഡിന്റെ വലയിൽ ആയിട്ടുള്ളത്.
