കഴക്കൂട്ടം: ആറുമാസം മുമ്പ് പിതാവ് വാഹനപകടത്തിൽ മരിച്ചതിന് പിന്നാലെ മകനും വാഹനപടത്തിൽ മരിച്ചു. ശ്രീകാര്യം പേരൂർക്കോണം ഇലഞ്ഞിയർത്തല അഭയം വീട്ടിൽ എം. മനോജ് (42) ആണ് മരിച്ചത്. കഴിഞ്ഞ വ്യാഴാഴ്ച രാവിലെ ഭാര്യയെ ജോലിക്ക് വിടാനായി പാങ്ങപ്പാറ ഹെൽത്ത് സെന്ററിന് മുന്നിൽ വച്ചാണ് അപകടം.
കഴക്കൂട്ടം ഭാഗത്തേക്ക് ബൈക്കിൽ പോവുകയായിരുന്നു മനോജും ഭാര്യയും. ശ്രീകാര്യം ഭാഗത്തുനിന്ന് പാങ്ങപ്പറയിലേക്ക് പോവുകയായിരുന്ന ടിപ്പർ ലോറി ഹെൽത്ത് സെന്ററിന് എതിർവശമുള്ള സംഗീത നഗറിലേക്ക് വളയുന്നതിനിടയിൽ വശത്തുകൂടെ പോവുകയായിരുന്ന ബൈക്കിൽ തട്ടിയാണ് അപകടം സംഭവിച്ചത്. ബൈക്കോടിച്ചിരുന്ന മനോജിന്റെ കാലിലൂടെ ടിപ്പറിന്റെ ചക്രം കയറിയിറങ്ങി.
കാലിന് ഗുരുതരമായി പരിക്കേറ്റ മനോജിനെ സ്വകാര്യ ആശുപത്രിയിൽ പ്രവേശിപ്പിച്ചു. തുടർന്ന് ചക്രങ്ങൾ കയറിയിറങ്ങി തകർന്ന മനോജിന്റെ കാൽ മുറിച്ചു മാറ്റി. തുടർ ചികിത്സയിലിരിക്കെ ഇന്നലെ ഉച്ചയോടെയാണ് മരിച്ചത്. അപകടത്തിൽ പരിക്കേറ്റ ഭാര്യ അഖില നിസാര പരിക്കുകളോടെ രക്ഷപെട്ടു. പരേതനായ മനോഹരൻ ലീല ദമ്പതികളുടെ മകനാണ്. ഭാര്യ അഖില എംപി. മക്കൾ അഭിമന്യൂ, അഭയ്. കഴക്കൂട്ടം അശ്വതി സ്റ്റുഡിയോയിലെ ജീവനക്കാരനാണ് മനോജ്,
മനോജിന്റെ പിതാവ് റ്റി. മനോഹരൻ നായർ (67) കഴിഞ്ഞ ഒക്ടോബർ മാസത്തിൽ ഉള്ളൂർ പാലത്തിനടുത്ത് വച്ചുണ്ടായ അപകടത്തിലാണ് മരിച്ചത്. ആർ ഡി എസ് കമ്പനിയിലെ ഡ്രൈവറായ മനോഹരൻ നായർ സ്കൂട്ടറിൽ ജോലി സ്ഥലത്തേക്ക് പോകവെ ലോറിക്കടിയിൽപ്പെട്ടാണ് മരിച്ചത്
