കൊല്ലം: വന്യജീവിതത്തെയും പരിസ്ഥിതി സന്തുലിതാവസ്ഥയേയും സാരമായി ബാധിക്കുന്ന രാക്ഷസക്കൊന്നകൾ ആര്യങ്കാവ് വനത്തിൽ കണ്ടെത്തി.തുടർന്ന് ഇത് നശിപ്പിക്കാനുള്ള ശ്രമങ്ങൾ അധികൃതർ ആരംഭിച്ചു.കടമാൻപാറ,അരുവിക്കെട്ട് ഭാഗത്തെ വനമേഖലയിലാണ് മഞ്ഞക്കൊന്ന എന്നുകൂടി വിളിപ്പേരുള്ള നാല്പത്തഞ്ചോളം മരങ്ങൾ കണ്ടെത്തിയത്.2004 -2005 കാലഘട്ടത്തിൽ സംസ്ഥാന വന പരിപാലനത്തിന്റെ ഭാഗമായി വിദേശത്തുനിന്നും പലതരം മരത്തൈകൾ ഇറക്കുമതി ചെയ്ത് നട്ടുപിടിപ്പിച്ചിരുന്നു.ഈ കൂട്ടത്തിലാണ് നാശകാരിയായ സെന്ന സാമി എന്ന മഞ്ഞക്കൊന്നയും ഉൾപ്പെട്ടത്.
ഈ അധിനിവേശ സസ്യത്തെ മനസ്സിലാക്കിയ ആര്യങ്കാവ് ഫോറസ്റ് റേഞ്ച് ഓഫീസർ പാലോട് ബൊട്ടാണിക്കൽ ഗാർഡൻ അധികൃതരെ വിവരം അറിയിച്ചു.ഇവിടുത്തെ ടെക്നിക്കൽ ഓഫീസർമാരായ ഡോ.ഇ എസ് സന്തോഷ് കുമാർ,എം എസ് ഷെരീഫ് എന്നിവരടങ്ങിയ സംഘം കടമാൻപാറ സന്ദർശിച്ചതിന്റെ ഫലമായാണ് ഈ അധിനിവേശ സസ്യത്തെ വനമേഖലയിൽ നിന്ന് ഒഴിപ്പിക്കാനുള്ള നടപടികൾ ആരംഭിച്ചത്.
തേയില,കാപ്പി തോട്ടങ്ങളിൽ തണൽ മരങ്ങളായി നട്ടുപിടിപ്പിച്ച ഈ വിദേശ ഇനം സസ്യമാണ് ഇപ്പോൾ തദ്ദേശീയ സസ്യങ്ങൾക്ക് ഭീഷണി ഉയർത്തി വളർന്നു കൊണ്ടിരിക്കുന്നത്.മുറിച്ചു കളഞ്ഞാലും വേരിൽ നിന്നും കിളിർക്കും എന്നതുകൊണ്ട് പടിപടിയായി ഉണക്കി നശിപ്പിക്കാനുള്ള ശ്രമമാണ് ഇപ്പോൾ നടപ്പിലാക്കുന്നത് .
