തിരുവനന്തപുരം: നവ കേരള സദസിനെ ജനം തള്ളിക്കളഞ്ഞ ജാള്യത മറയ്ക്കാൻ മുഖ്യമന്ത്രിയുടെ ആഹ്വാന പ്രകാരം സിപിഎം ക്രിമിനലുകളും പോലീസും വ്യാപകമായി കോണ്ഗ്രസ് പ്രവര്ത്തകരെ ആക്രമിക്കുകയാണെന്ന് കെ സുധാകരൻ എം പി. സർക്കാരിനെതിരെയും പോലീസിനെതിരെയും തന്റെ ഫേസ്ബുക്ക് പോസ്റ്റിലൂടെയാണ് രൂക്ഷ വിമർശനവുമായി കെ സുധാകരൻ എം പി രംഗത്തെത്തിയിരിക്കുന്നത്.
മുദ്രാവാക്യം വിളിച്ചതിന്റെ പേരില് ആലപ്പുഴയില് കെഎസ് യു – യൂത്ത് കോണ്ഗ്രസ് പ്രവര്ത്തകരെ മുഖ്യമന്ത്രിയുടെ സുരക്ഷാ ഉദ്യോഗസ്ഥനും പോലീസും മൃഗീയമായിട്ടാണ് മര്ദ്ദിച്ചതെന്നും ലാത്തികൊണ്ടുള്ള അടിയേറ്റ് യൂത്ത് കോണ്ഗ്രസ് പ്രവര്ത്തകന്റെ തലക്ക് മാരക പരിക്കേൽക്കുകയുണ്ടായെന്നും അദ്ദേഹം ആരോപിച്ചു. ഇത്തരത്തിൽ തുടരെ തുടരെയുള്ള അക്രമങ്ങൾ തീക്കൊള്ളികൊണ്ട് തലചൊറിയുന്ന പണിയാണെന്ന് മുഖ്യമന്ത്രിയും മന്ത്രിമാരും ഓര്ത്താല് നല്ലതാണെന്നും അദ്ദേഹം പറഞ്ഞു.
ഫേസ്ബുക്ക് പോസ്റ്റിന്റെ പൂർണ്ണ രൂപം;
നവ കേരള സദസിനെ ജനം തള്ളിക്കളഞ്ഞ ജാള്യത മറയ്ക്കാൻ മുഖ്യമന്ത്രിയുടെ ആഹ്വാന പ്രകാരം സിപിഎം ക്രിമിനലുകളും പോലീസും വ്യാപകമായി കോണ്ഗ്രസ് പ്രവര്ത്തകരെ ആക്രമിക്കുകയാണ്.
കെപിസിസി ജനറല് സെക്രട്ടറി എം.ജെ.ജോബിന്റെ വീട് സിപിഎമ്മുകാരും സിഐടിയും ചേര്ന്ന് ആക്രമിക്കുകയും അദ്ദേഹത്തിന്റെ ഭാര്യയുടെ കഴുത്തിന് പിടിച്ച് പരിക്കേല്പ്പിക്കുകയും ചെയ്തത് വളരെ ആശങ്കാജനകമായ സാഹചര്യമാണ് ഉണ്ടാക്കിയിരിക്കുന്നത്.
മുദ്രാവാക്യം വിളിച്ചതിന്റെ പേരില് ആലപ്പുഴയില് കെഎസ് യു – യൂത്ത് കോണ്ഗ്രസ് പ്രവര്ത്തകരെ മുഖ്യമന്ത്രിയുടെ സുരക്ഷാ ഉദ്യോഗസ്ഥനും പോലീസും മൃഗീയമായിട്ടാണ് മര്ദ്ദിച്ചത്. ലാത്തികൊണ്ടുള്ള അടിയേറ്റ് യൂത്ത് കോണ്ഗ്രസ് പ്രവര്ത്തകന്റെ തലക്ക് മാരക പരിക്കേൽക്കുകയുണ്ടായി. ഇതിൽ നിന്നെല്ലാം ഒരു പടി കടന്ന് പ്രതിഷേധിക്കുന്ന കോൺഗ്രസ് പ്രവർത്തകരുടെ വീട്ടിലുള്ള സ്ത്രീകള്ക്കെതിരെയും ആക്രമണം അഴിച്ചു വിടാൻ തുടങ്ങിയിരിക്കുന്നു എന്നത് മുഖ്യമന്ത്രിയുടെയും സിപിഎം നേതൃത്വത്തിന്റെയും അനുവാദത്തോടെയാണ് ഇതെല്ലാം സംഭവിക്കുന്നത് എന്നതിന്റെ തെളിവാണ്. ഇത്തരത്തിൽ തുടരെ തുടരെയുള്ള അക്രമങ്ങൾ തീക്കൊള്ളികൊണ്ട് തലചൊറിയുന്ന പണിയാണെന്ന് മുഖ്യമന്ത്രിയും മന്ത്രിമാരും ഓര്ത്താല് നല്ലതാണ്.
കയറൂരിവിട്ട ക്രിമിനലുകളായ അണികളെ നിലയ്ക്ക് നിര്ത്താന് സിപിഎം തയ്യാറായില്ലെങ്കില് ശക്തമായി തന്നെ കോണ്ഗ്രസ് തിരിച്ചടിക്കും.
