കൊച്ചി: വാഗ്ദാനങ്ങൾ നൽകുന്നതിനൊപ്പം അത് നിറവേറ്റുന്ന സർക്കാരാണ് കേരളം ഭരിക്കുന്നതെന്ന് രജിസ്ട്രേഷൻ, പുരാവസ്തു, പുരാരേഖാ വകുപ്പ് മന്ത്രി രാമചന്ദ്രൻ കടന്നപ്പള്ളി. പുതിയകാവ് ക്ഷേത്ര മൈതാനിയിൽ സംഘടിപ്പിച്ച തൃപ്പൂണിത്തുറ മണ്ഡലതല നവകേരള സദസിൽ സംസാരിക്കുകയായിരുന്നു മന്ത്രി.
ജനകീയ പ്രശ്നങ്ങൾ പരിഹരിക്കുന്നതിലും വികസന, സാമൂഹിക, ക്ഷേമ പ്രവർത്തനങ്ങളിലും ജാതിമത വ്യത്യാസമില്ലാതെയാണ് സർക്കാർ പ്രവർത്തിക്കുന്നത്. നിരവധി വെല്ലുവിളികളാണ് സർക്കാർ നേരിട്ടത്. പ്രളയം, നിപ, കോവിഡ് തുടങ്ങി നിരവധി പ്രതിസന്ധി ഘട്ടങ്ങളിൽ ജനങ്ങൾക്ക് കരുത്ത് പകർന്നു കൂടെ നിൽക്കാൻ സർക്കാരിന് സാധിച്ചു. കേരളത്തിന് അവകാശപ്പെട്ടതെല്ലാം നേടിക്കൊടുക്കുന്നതിൽ യാതൊരുവിധ വിട്ടുവീഴ്ചയുമില്ലാതെയാണ് മന്ത്രിസഭ പ്രവർത്തിക്കുന്നത്. ഏത് കാര്യത്തിലും പ്രയാസങ്ങളും പ്രതിബന്ധങ്ങളും എന്ത് എന്ന് അറിഞ്ഞാണ് സർക്കാർ മുന്നോട്ടുപോകുന്നത്.
ചരിത്രഭൂമിയായ തൃപ്പൂണിത്തുറയിൽ നിരവധി വികസന പ്രവർത്തനങ്ങളാണ് സർക്കാരിന്റെ നേതൃത്വത്തിൽ നടപ്പിലാക്കി വരുന്നത്. ജനങ്ങളെ കാണാനും ജനങ്ങൾ പറയുന്നത് കേൾക്കുകയുമാണ് നവകേരള സദസിലൂടെ സർക്കാർ ചെയ്തത്. മുഖ്യമന്ത്രിയുടെ നേതൃത്വത്തിൽ കാസർഗോഡ് നിന്ന് ആരംഭിച്ച ജൈത്രയാത്രയ്ക്ക് ലഭിച്ച പിന്തുണയാണ് നവകേരള സദസിലെ ജനപങ്കാളിത്തമെന്നും മന്ത്രി പറഞ്ഞു.
