തിരുവനന്തപുരം: സര് സിപിയെപ്പോലും ലജ്ജിപ്പിക്കുന്ന കിരാത നടപടിയാണ് യൂത്ത് കോണ്ഗ്രസ് സംസ്ഥാന അധ്യക്ഷന് രാഹുല് മാങ്കൂട്ടത്തിന്റെ നാടകീയമായ അറസ്റ്റെന്ന് കെ പി സി സി പ്രസിഡണ്ട് കെ സുധാകരൻ. സ്തുതിപാടകരാല് ചുറ്റപ്പെട്ട മുഖ്യമന്ത്രി സമനില തെറ്റിയതുപോലെയാണ് പ്രവര്ത്തിക്കുന്നതെന്നും രാഹുലിനെ കരിച്ചു കളയാമെന്ന് പിണറായി വിജയന് കരുതുന്നുണ്ടെങ്കില് ആ പരിപ്പ് ഇവിടെ വേകില്ലെന്നും കെ സുധാകരൻ പറഞ്ഞു.
പോലീസ് മര്ദനമേറ്റ രാഹുലിനെ ആശുപത്രിയില്നിന്നു ചികിത്സ കഴിഞ്ഞ വന്നയുടനേയാണ് അപ്രതീക്ഷിതമായി അറസ്റ്റ് ചെയ്തത്. ഭീകരോടുംപോലും ഇങ്ങനെ ചെയ്യില്ലെന്നും ക്രിമിനല് കേസിലെ പ്രതികളെ പിടികൂടുന്നതുപോലെ വീടുകയറി വളഞ്ഞിട്ട് പിടികൂടേണ്ട ഒരു സാഹചര്യവുമില്ലെന്നും സംസ്ഥാനത്തെ ഏറ്റവും വലിയ യുവജനപ്രസ്ഥാനമായ യൂത്ത് കോണ്ഗ്രസിന്റെ സംസ്ഥാന അധ്യക്ഷനായ രാഹുല് ജനങ്ങളുടെ ഇടയില് ജീവിക്കുന്ന പൊതുപ്രവര്ത്തകനാണെന്നും സുധാകരൻ വ്യക്തമാക്കി. നോട്ടീസ് അയച്ചുവിളിച്ചാല് നേരിട്ട് പോലീസ് സ്റ്റേഷനില് ഹാജരാകുന്നയാളാണ് അദ്ദേഹം.
സിപിഎമ്മും പോലീസും ചേര്ന്നുള്ള വ്യക്തമായ ഗൂഢാലോചനയുടെ അടിസ്ഥാനത്തിലാണ് രാഹുലിനെ അറസ്റ്റ് ചെയ്തത്. നവകേരള സദസിനെതിരെ പ്രതിഷേധിച്ച യൂത്ത് കോണ്ഗ്രസ് പ്രവര്ത്തകരെ ചെടിച്ചട്ടിയും ഇരുമ്പുവടിയും കൊണ്ട് അക്രമിച്ച ഡിവൈഎഫ്ഐ -സിപിഎം ക്രിമിനലുകളും കുറുവടി ഉപയോഗിച്ച് പ്രവര്ത്തകരെ മര്ദ്ദിച്ച മുഖ്യമന്ത്രിയുടെ സുരക്ഷാ ഉദ്യോഗസ്ഥരും കെപിസിസി ഭാരവാഹിയുടെ വീടാക്രമിച്ച ക്രിമിനലുകളും നാട്ടിൽ സ്വൈര്യ വിഹാരം നടത്തുമ്പോഴാണ് രാഹുല് മാങ്കൂട്ടത്തെ അറസ്റ്റ് ചെയ്തത്. പ്രതിക്ഷേധിക്കുന്നവരെ ഈ അറസ്റ്റിലൂടെ നിശബ്ദമാക്കാമെന്ന ഫാഷിസ്റ്റ് ചിന്താഗതി കോൺഗ്രസ്സിന്റെ അടുത്ത് വിലപോകില്ലെന്നും കെ സുധാകരൻ വ്യക്തമാക്കി.
