കോട്ടയം: 40കാരിയുടെ ഗർഭ പാത്രത്തിൽ നിന്നും 4.5 കിലോ തൂക്കം വരുന്ന ഗര്ഭപാത്രമുഴ നീക്കം ചെയ്തു. പാലാ കെ.എം. മാണി സ്മാരക ഗവ. ജനറല് ആശുപത്രിയിലാണ് അതി സങ്കീർണമായ ശസ്ത്രക്രിയ വിജയകരമായി പൂർത്തിയാക്കിയത്.
പാലാ മരങ്ങാട്ടുപിള്ളി സ്വദേശിനിയായ 40 വയസുകാരിയ്ക്കാണ് ശസ്ത്രക്രിയ നടത്തിയത്. വയറുവേദനയുമായി ആണ് 40 കാരി ജനറൽ ആശുപത്രിയിൽ എത്തിയത്. തുടർന്ന് നടത്തിയ പരിശോധനയിലാണ് മുഴ ഉള്ളതായി ശ്രദ്ധയിൽ പെട്ടത്. തുടർന്നാണ് ജനറല് ആശുപത്രിയില് സജ്ജമാക്കിയ പുതിയ അത്യാധുനിക ശസ്ത്രക്രിയ ഉപകരണങ്ങളുടെ സഹായത്തോടെ ശാസ്ത്രക്രിയ നടത്തിയത്.
സര്ക്കാര് മേഖലയില് അപൂര്വമായി ചെയ്യുന്ന സങ്കീര്ണമായ ഈ ശസ്ത്രക്രിയ ഒരു ജില്ലാതല ആശുപത്രിയില് വിജയകരമായി പൂര്ത്തിയാക്കാനായത് വലിയ നേട്ടമാണെന്ന് ആരോഗ്യവകുപ്പ് മന്ത്രി വീണ ജോർജ് പറഞ്ഞു. വിജയകരമായി ശസ്ത്രക്രിയ നടത്തിയ ജനറല് ആശുപത്രിയിലെ മുഴുവന് ടീമിനേയും മന്ത്രി അഭിനന്ദിച്ചു.
ആശുപത്രി സൂപ്രണ്ട് ഡോ. അഭിലാഷ് ടി.പി.യുടെ നേതൃത്വത്തിൽ ഗൈനക്കോളജി വിഭാഗത്തിലെ ഡോ. ആശാറാണി, ഡോ. തോമസ് കുര്യാക്കോസ്, ഡോ. സന്ദീപ എന്നിവരും അനസ്തേഷ്യാ വിഭാഗത്തിലെ ഡോ. രമ്യ, സ്റ്റാഫ് നഴ്സ് സീന എന്നിവരും അടങ്ങിയ ടീമാണ് ശസ്ത്രക്രിയ നടത്തിയത്.
