തുർക്കി: തുർക്കിയിലും സിറിയയിലും ഉണ്ടായ അതിശക്തമായ ഭൂചലനത്തിൽ മരണസംഖ്യ 4,300 കടന്നുവെന്ന് റിപ്പോർട്ട്. തുർക്കിയിൽ മാത്രം 2,900 പേർ മരിച്ചു. 15,000 ൽ ഏറെ പേർക്ക് പരിക്കേറ്റതായും പ്രസിഡന്റ് തയിപ് എർദോഗൻ അറിയിച്ച. 1400 പേരാണ് അയൽ രാജ്യമായ സിറിയയിൽ മരണമടഞ്ഞത്. ഇനിയും മരണസംഖ്യ 8 മടങ്ങ് വർധിക്കുമെന്ന് ലോകാരോഗ്യ സംഘടന റിപ്പോർട്ട് ചെയ്തു.
രക്ഷാപ്രവർത്തനത്തെ പ്രതികൂലമായ കാലവസ്ഥ തടസ്സപ്പെടുത്തുന്നുണ്ട്. ഇപ്പോഴും നൂറുകണക്കിനു പേരാണ് കെട്ടിടാവിശിഷ്ടങ്ങൾക്കിടയിൽ കുടുങ്ങിക്കിടക്കുന്നത്.മരണനിരക്ക് ഇനിയും ഉയരുമെന്നാണ് പ്രാഥമിക വിവരം. രക്ഷാപ്രവർത്തനങ്ങൾക്കിടയിലും ചില സ്ഥലങ്ങളിൽ കെട്ടിടങ്ങൾ തകർന്നതായി റിപ്പോർട്ടുകളുണ്ട്.
45 രാജ്യങ്ങൾ സഹായവാഗ്ദാനവുമായി രംഗത്തെത്തിയിട്ടുണ്ട്. 2 എൻഡിആർഎഫ് സംഘങ്ങളെയാണ് ദുരന്ത നിവാരണത്തിനായി ഇന്ത്യ നിയോഗിച്ചിരിക്കുന്നത്. ഇന്ത്യക്കു പുറമേ ബ്രിട്ടൻ, ജർമനി, ഫ്രാൻസ്, ഇസ്രയേൽ, കാനഡ, ഗ്രീസ്, ഈജിപ്ത് തുടങ്ങിയ രാജ്യങ്ങളുംസഹായം വാഗ്ദാനം ചെയ്തിട്ടുണ്ട്. നൂറ്റാണ്ടിനിടെ ഉണ്ടായ ഏറ്റവും ശക്തിയേറിയ ഭൂചലനമാണ് ഇരുരാജ്യങ്ങളിലും ഉണ്ടായതെന്നാണ് വിലയിരുത്തൽ. നിലവിൽ ഇവിടെ അതിർത്തി മേഖലയിലുണ്ടായ തുടർച്ചയായ 3 ഭൂചലനങ്ങളാണ് കനത്തനാശം വിതച്ചത്.
വിമതരുടെ കൈവശമുള്ള മേഖലകളിൽ കുറഞ്ഞത് 120 പേരെങ്കിലും മരിച്ചിട്ടുണ്ടാകാമെന്നാണ് റിപ്പോർട്ട്. രണ്ടായിരം വർഷത്തോളം പഴക്കമുള്ള ചരിത്രസ്മാരകങ്ങളും ഭൂചലനത്തിൽ നിലംപൊത്തി. അലപ്പോ, ഹാമ, ലറ്റാകിയ എന്നിവിടങ്ങളെയാണ് ഭൂകമ്പം ഏറെ ബാധിച്ചത്.
