ആലപ്പുഴ: എം.കെ.രാഘവൻ എംപിയുടെ വിമര്ശനത്തിന് മറുപടിയുമായി എഐസിസി ജനറല് സെക്രട്ടറി കെ.സി വേണുഗോപാല് രംഗത്ത്. പാര്ട്ടിക്കുള്ളിലാണ് അഭിപ്രായങ്ങള് പറയേണ്ടത്. പ്ലീനറിയില് പങ്കെടുത്തയാളാണ് രാഘവന്. അവിടെ അഭിപ്രായം പറയണമായിരുന്നുവെന്നും പരസ്യ പ്രതികരണം ഗുണംചെയ്യില്ലെന്നും കെ.സി.വേണുഗോപാല് പറഞ്ഞു. മാത്രമല്ല വിമര്ശനങ്ങള് സ്വാഭാവികമാണെന്നും ഉന്നയിക്കുന്നത് പുറത്താവരുതെന്നും അദ്ദേഹം കൂട്ടിച്ചേര്ത്തു.
കോഴിക്കോട് പി.ശങ്കരന് സ്മാരക പുരസ്കാരം കെപിസിസി മുന് അധ്യക്ഷന് വി,എം സുധീരന് സമ്മാനിക്കുന്ന ചടങ്ങിലായിരുന്നു കോണ്ഗ്രസ് നേതൃത്വത്തെ എം.കെ.രാഘവന് വിമര്ശിച്ചത്. ഉപയോഗിച്ച് വലിച്ചെറിയുക എന്നതാണ് കോണ്ഗ്രസ് രീതിയെന്നായിരുന്നു രാഘവന്റെ പരാമര്ശം. കോൺഗ്രസ് പാർട്ടിയുടെ അവസ്ഥ സ്ഥാനവും മാനവും വേണമെങ്കിൽ മിണ്ടാതിരിക്കുക എന്നതാണ്. പാർട്ടിയിൽ വിയോജിപ്പും വിമർശനവും നടത്താൻ പറ്റാത്ത സ്ഥിതിയാണെന്നും ലീഗിൽ പോലും ഉൾപ്പാർട്ടി ജനാധിപത്യം പുനഃസ്ഥാപിച്ചുവെന്നും എം.കെ.രാഘവന് പറഞ്ഞു.
