മംഗലപുരം: ബസ് യാത്രയ്ക്കിടയിൽ വിദ്യാർത്ഥിനിയെ ആക്രമിച്ച കേസിൽ യുവാവ് അറസ്റ്റിൽ. ആറ്റിങ്ങൽ പൂവണത്തുംമൂട് വാടകയ്ക്ക് താമസിക്കുന്ന ഇന്ദ്രജിത്തിനെ(25)യാണ് മംഗലപുരം പോലീസ് അറസ്റ്റ് ചെയ്തത്. ബുധനാഴ്ച രാവിലെ 8 മണിക്കാണ് സംഭവമുണ്ടായത്. പള്ളിപ്പുറത്തു നിന്നും ട്യൂഷൻ കഴിഞ്ഞു ബസിൽ വരികയായിരുന്ന വിദ്യാർത്ഥിനിയെ അതെ ബസിൽ യാത്ര ചെയ്തിരുന്ന ഇന്ദ്രജിത് അസഭ്യം പറയുകയും വിദ്യാർത്ഥിനിയുടെ ശരീരത്തിൽ തുപ്പുകയും ചെയ്തു.
സംഭവം പെൺകുട്ടി ബസിൽ യാത്രക്കാരോട് അറിയിച്ചെന്നറിഞ്ഞ ഇന്ദ്രജിത് മംഗലപുരം ജംഗ്ഷനിൽ ബസ് നിർത്തിയപ്പോൾ ഇറങ്ങി ഓടാൻ ശ്രെമിച്ചു. ജംഗ്ഷനിൽ ഉണ്ടായിരുന്ന നാട്ടുകാർ ചേർന്ന് ഇയാളെ പിടികൂടി പോലീസിനെ ഏൽപ്പിക്കുകയായിരുന്നു. പെൺകുട്ടിയുടെ പരാതിയിൻമേൽ പോലീസ് കേസെടുത്തു. ഇയാൾ കഴിഞ്ഞ ആഴ്ചയും ബസിൽ സമാനമായ രീതിയിൽ പ്രശ്നം ഉണ്ടാക്കിയെന്നു പോലീസ് പറഞ്ഞു. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു
