തിരുവനന്തപുരം: ‘ യുദ്ധമല്ല സമാധാനമാണ് വേണ്ടത്’ എന്ന ആഹ്വാനത്തോടെ, പലസ്തീൻ- ഇസ്രയേൽ യുദ്ധസംഘർഷങ്ങൾ അവസാനിപ്പിച്ച് സമാധാനം ഉറപ്പുവരുത്തണം എന്ന് ആവശ്യപ്പെട്ടുകൊണ്ട് തുമ്പ സെന്റ് സേവ്യേഴ്സ് കോളേജ് യുദ്ധവിരുദ്ധ വാരാചരണം സംഘടിപ്പിക്കുന്നു.
സ്വന്തം മണ്ണിൽ ഭീതികൂടാതെ കഴിയാനാവുക എന്ന അടിസ്ഥാന മനുഷ്യാവകാശം ലോകത്തെവിടെയും സംരക്ഷിക്കപ്പെടണം എന്ന് ഉദ്ബോധിപ്പിച്ചുകൊണ്ട് കോളെജിലെ ഹ്യൂമൻ റൈറ്റ്സ് ക്ലബ്ബിന്റെ നേതൃത്വത്തിൽ എല്ലാ വിദ്യാർത്ഥികളെയും അധ്യാപകരെയും പങ്കെടുപ്പിച്ചുകൊണ്ട് ക്യാമ്പസിനുള്ളിൽ മൗനജാഥ സംഘടിപ്പിക്കുകയും കലാലയത്തിന്റെ യുദ്ധവിരുദ്ധ നിലപാടും സന്ദേശവും രേഖപ്പെടുത്തിയ ബാനർ കോളേജിന് മുന്നിൽ സ്ഥാപിക്കുകയും ചെയ്തു.
ഇതോടൊപ്പം തന്നെ പലസ്തീൻ-ഇസ്രയേൽ യുദ്ധം അവസാനിപ്പിക്കുന്നതിന് ചെയ്യാൻ കഴിയുന്ന എല്ലാത്തരം ഇടപെടലുകളും നടത്തണമെന്ന് അഭ്യർത്ഥിച്ചുകൊണ്ട് രാഷ്ട്രപതിക്കും ഇന്ത്യൻ പ്രധാനമന്ത്രിക്കും വിദ്യാർത്ഥികളും അധ്യാപകരും ചേർന്ന് ഓരോ കത്ത് തയ്യാറാക്കുകയും തപാൽമാർഗ്ഗം അയയ്ക്കുകയും ചെയ്തു.
വരുന്ന ബുധൻ, വ്യാഴം, വെള്ളി ദിവസങ്ങളിലായി യുദ്ധവിരുദ്ധ പ്രതിജ്ഞ, യുദ്ധവിരുദ്ധ- സമാധാന നിലപാടിന്റെ പ്രഖ്യാപനം, പ്രഖ്യാപനത്തിനുമേൽ വിദ്യാർത്ഥികളുടെ കൈമുദ്ര പതിപ്പിക്കൽ, യുദ്ധക്കെടുതികളെ സംബന്ധിച്ച ബോധവൽക്കരണം,ഇരു രാജ്യങ്ങളിലെയും നിലവിലെ സംഘർഷാവസ്ഥയെ സംബന്ധിച്ച ചർച്ചകൾ, സമാധാനസംരക്ഷണം ഉറപ്പുവരുത്തുക എന്ന സന്ദേശം പ്രചരിപ്പിക്കുന്ന തരത്തിലുള്ള വിദ്യാർത്ഥികളുടെ ആവിഷ്കാരങ്ങൾ എന്നിവ കോളേജിൽ സംഘടിപ്പിക്കും
