തിരുവനന്തപുരം: സംസ്ഥാനത്ത് പലയിടങ്ങളിലും കനത്ത മഴ തുടരുകയാണ്. ഈ സാഹചര്യത്തിൽ ജില്ലയിലെ മൂന്നു നദികളില് കേന്ദ്ര ജല കമ്മീഷന് വെള്ളപ്പൊക്ക മുന്നറിയിപ്പ് നല്കി. കരമനയാർ, നെയ്യാർ, മണിമല പുഴകളിലാണ് ജാഗ്രത നിർദ്ദേശം നൽകിയിരിക്കുന്നത്.
കരമന നദിയിലെ വെള്ളെകടവ് സ്റ്റേഷനില് ഓറഞ്ച് അലര്ട്ടും നെയ്യാര് നദിയിലെ അരുവിപ്പുറം സ്റ്റേഷനിലും വാമനപുരം നദിയിലെ അയിലം സ്റ്റേഷനിലും യെലോ അലര്ട്ടും ജല കമ്മീഷന് പ്രഖ്യാപിച്ചു. തീരത്തോട് ചേര്ന്ന് താമസിക്കുന്നവര് ജാഗ്രത പാലിക്കണമെന്നും മുന്നറിയിപ്പില് പറയുന്നു.
അതേസമയം സംസ്ഥാനത്ത് നാല് ജില്ലകളിൽ ഒറ്റപ്പെട്ട ശക്തമായ മഴയ്ക്ക് സാധ്യതയെന്നാണ് പുതിയ കാലാവസ്ഥ മുന്നറിയിപ്പിൽ പറയുന്നത്. 4 ജില്ലകൾക്ക് യെല്ലോ അലെർട് പ്രഖ്യാപിച്ചു. തിരുവനന്തപുരം, കൊല്ലം, പത്തനംതിട്ട, ആലപ്പുഴ എന്നീ ജില്ലകളിലാണ് യെല്ലോ അലെർട് പ്രഖ്യാപിച്ചത്.
മാത്രമല്ല തിരുവനന്തപുരം ജില്ലയിൽ ദുരിതാശ്വാസ ക്യാമ്പുകൾ പ്രവർത്തിക്കുന്ന സ്കൂളുകൾക്ക് റവന്യു വകുപ്പ് മന്ത്രി കെ. രാജൻ നാളെ അവധി പ്രഖ്യാപിച്ചു. 17 ക്യാമ്പുകള് തുടങ്ങിയിട്ടുണ്ട്. 572 പേര് ക്യാമ്പുകളില് താമസിക്കുന്നുണ്ട്. നഗരത്തില് മാത്രം 15 ക്യാമ്പുകള് തുറന്നെന്നും മന്ത്രി പറഞ്ഞു.
