തിരുവനന്തപുരം: സംസ്ഥാനത്ത് ക്ഷേമ പെൻഷൻ വിതരണം ഇന്ന് മുതൽ. സംസ്ഥാനത്ത് നേരത്തെ പ്രഖ്യാപിച്ച ക്ഷേമ പെൻഷൻ വിതരണത്തിനാണ് ഉത്തരവിറങ്ങിയത്. ഒരാഴ്ചയ്ക്ക് മുൻപാണ് സർക്കാർ ഒരു മാസത്തെ പെൻഷൻ വിതരണം ഉടൻ വിതരണം ചെയ്യുമെന്ന് പ്രഖ്യാപിച്ചത്. 684 കോടി 29 ലക്ഷം രൂപയാണ് അനുവദിച്ചിരിക്കുന്നത്. ഇന്ന് തന്നെ വിതരണം തുടങ്ങണമെന്നും നവംബർ 26 നകം പൂർത്തിയാക്കണമെന്നുമാണ് നിർദ്ദേശം.
ജൂലൈ മാസത്തെ പെൻഷനാണ് വിതരണം ചെയ്യുക. മൂന്ന് മാസത്തെ കുടിശ്ശിക കൂടി നൽകാനുണ്ട്. 50,90390 പേരാണ് നിലവിൽ ലിസ്റ്റിലുള്ളതെന്നാണ് തദ്ദേശ വകുപ്പിന്റെ കണക്കുകൾ പറയുന്നത്. ക്ഷേമനിധി പെൻഷനുകൾക്കായി വേറെ ഉത്തരവ് ഇറങ്ങും. പെൻഷൻ നേരിട്ട് ലഭിക്കുന്നവർക്ക് സഹകരണ സംഘങ്ങൾ വഴിയും, അല്ലാതെയുള്ളവർക്ക് ബാങ്ക് അക്കൗണ്ടുവഴിയും തുക ലഭിക്കുമെന്നാണ് അറിയിച്ചിരുന്നത്.
