കോഴിക്കോട്: മലയാളത്തിന്റെ അഭിമാനമായ സാഹിത്യകാരി പി. വത്സല അന്തരിച്ചു. 85 വയസ്സായിരുന്നു. ഹൃദയാഘാതത്തെ തുടര്ന്ന് കോഴിക്കോട് മുക്കം കെ.എം.സി.ടി മെഡിക്കല് കോളജിലായിരുന്നു അന്ത്യം. കേരള സാഹിത്യ അക്കാദമി അധ്യക്ഷയായിരുന്നു.
കേരള സാഹിത്യ അക്കാദമി അവാര്ഡ്, എഴുത്തച്ഛന് പുരസ്കാരം, മുട്ടത്തു വര്ക്കി അവാര്ഡ്, സി വി കുഞ്ഞിരാമന് സ്മാരക സാഹിത്യ അവാര്ഡ് തുടങ്ങി നിരവധി സാഹിത്യ ബഹുമതികള് ലഭിച്ചിട്ടുണ്ട്. ഭർത്താവ് മാറോളി അപ്പുക്കുട്ടിക്കൊപ്പം മുക്കത്തിനടുത്ത് അഗസ്ത്യമുഴിയിൽ മകൾ എം.എ.മിനിയുടെ വീട്ടിലായിരുന്നു താമസം.
‘നെല്ല്’ എന്ന നോവലിലൂടെയാണ് എഴുത്തിന്റെ ലോകത്ത് ശ്രദ്ധേയയായത്. ഇരുപതോളം നോവലുകളും മുന്നൂറിലേറെ ചെറുകഥകളും ബാലസാഹിത്യകൃതികളും ജീവചരിത്ര ഗ്രന്ഥങ്ങളും യാത്രാവിവരണങ്ങളും എഴുതി. സംസ്കാരം മകൻ ഡോ. അരുൺ മാറോളി ന്യൂയോർക്കിൽ നിന്ന് എത്തിയശേഷം.
