കൊല്ലം: ഓയൂരിൽ നിന്നും ഇന്നലെ വൈകിട്ട് ആറുവയസുകാരിയെ തട്ടിക്കൊണ്ടു പോയ സംഭവത്തിൽ പോലീസ് അന്വേഷണം ഊർജിതമായി തുടരുന്നു. വിവിധ സ്ഥലങ്ങളിൽ കാർ കേന്ദ്രീകരിച്ച് അന്വേഷണം നടത്തുകയാണ്. റിമോട്ട് ഏരിയകൾ കേന്ദ്രീകരിച്ചാണ് അന്വേഷണം നടത്തുന്നത്.
കാര്‍ ജില്ലാ അതിര്‍ത്തികളിലൂടെ കടന്നുപോകുന്ന സിസിടിവി ദൃശ്യങ്ങള്‍ ഇതുവരെ ലഭ്യമായിട്ടില്ല. അതുകൊണ്ടാണ് റൂറല്‍ ഏരിയകള്‍ കേന്ദ്രീകരിച്ച് അന്വേഷണം നടത്താൻ പോലീസ് തീരുമാനിച്ചിരിക്കുന്നത്. ഒറ്റപ്പെട്ട വിജനമായ ഇടങ്ങളിലും പൊലീസ് പരിശോധന ശക്തമാണ്.
ഇന്നലെ വൈകുന്നേരത്തോടെയാണ് പെൺകുട്ടിയെ കാറിലെത്തിയ സംഘം തട്ടിക്കൊണ്ടുപോയത്. സംഭവത്തിൽ തിരുവനന്തപുരത്ത് നിന്ന് മൂന്ന് പേരെ പൊലീസ് കസ്റ്റഡിയിലെടുത്തിരുന്നു. ഇവരെ ചോദ്യം ചെയ്ത ശേഷം വിട്ടയ്ക്കുമെന്നാണ് സൂചന.
