പാലക്കാട്‌: ഇടുക്കി സ്വദേശിനിയായ ജിലു മോൾ മേരി തോമസിന് ഭിന്നശേഷി ദിന പാരിതോഷികമായി മുഖ്യമന്ത്രി പിണറായി വിജയൻ ഫോർ ‘വീലർ ഡ്രൈവിംഗ് ലൈസൻസ് കൈമാറി.
ഇരുകൈകളും ഇല്ലാത്ത ഒരു വ്യക്തിക്ക് ഫോർ വീലർ ഡ്രൈവിംഗ് ലൈസൻസ് ലഭിക്കുന്ന ഏഷ്യയിലെ തന്നെ ആദ്യ വനിതയാണ് ജിലു.
നാളെ(ഡിസംബർ 3) ഭിന്നശേഷി ദിനാഘോഷ മാചരിക്കാനിരിക്കെയാണ് ജിലുവിന് മുഖ്യമന്ത്രി ലൈസൻസ് കൈമാറിയത്. കഴിഞ്ഞ അഞ്ച് വർഷമായി ഫോർ വീലർ ഡ്രൈവിംഗ് ലൈസൻസ് ലഭിക്കുന്നതിനുള്ള പരിശ്രമത്തിലായിരുന്നു ജിലു. സംസ്ഥാന ഭിന്നശേഷി കമ്മീഷൻ്റെ ഇടപെടലിൽ എറണാകുളം ആർ.ടി.ഒ പ്രസ്തുത കേസ് പരിശോധിക്കുകയും നിരവധി ഓൺലൈൻ ഹിയറിങ്ങികളുടെയും അടിസ്ഥാനത്തിലാണ് ലൈസൻസ് അനുവദിച്ചത്. ഇരു കൈകളുടെയും അഭാവത്തിൽ സുരക്ഷിതമായി ഡ്രൈവ് ചെയ്യാൻ കഴിയുന്ന വിധം ജിലുവിന്റെ മോട്ടോർ കാർ പ്രവർത്തനത്തിൽ മാറ്റം വരുത്തി ഡ്രൈവിംഗ് ടെസ്റ്റ്‌ നടത്തി ലൈസൻസിംഗ് അതോറിറ്റി ഡ്രൈവിംഗ് ലൈസൻസ് നൽകുകയായിരുന്നു. 2016 ലെ ഭിന്നശേഷി അവകാശ നിയമത്തിലെ 41 (2) വകുപ്പ് പ്രകാരം ഭിന്നശേഷിക്കാരായ വ്യക്തികൾക്ക് സുരക്ഷിതമായി യാത്ര ചെയ്യുന്നതിന്, തങ്ങളുടെ വാഹനങ്ങളുടെ ഘടനയിൽ കാര്യമായ മാറ്റങ്ങൾ വരുത്താതെ, അവയുടെ പ്രവർത്തന രീതിയിൽ അനുയോജ്യമായ മാറ്റങ്ങൾ വരുത്തി ഉപയോഗിക്കുന്നതിന് വ്യവസ്ഥ ചെയ്തിട്ടുണ്ട്.
