തിരുവനന്തപുരം: സിനിമാ മേഖലയിൽ തൊഴിലെടുക്കുന്നവരുടെ അവകാശങ്ങൾക്ക് ഊന്നൽ നൽകിയുള്ള സിനിമാനയം അനിവാര്യമെന്ന് ഓപ്പൺ ഫോറം. മറ്റു സംസ്ഥാനങ്ങളിലെ മികച്ച നിർദ്ദേശങ്ങൾ ഉൾകൊള്ളിച്ചു കൊണ്ടാവണം സംസ്ഥാനത്ത് സിനിമാനയംരൂപീകരിരിക്കേണ്ടതെന്ന് നിർമ്മാതാവ് സുരേഷ്കുമാർ പറഞ്ഞു . ജെൻഡറിനും പ്രേക്ഷകർക്കും അർഹമായ പരിഗണന നൽകണമെന്നും മിക്ക സംസ്ഥാനങ്ങളിലേയും സിനിമാ നയത്തെ ടൂറിസം നയവുമായി ബന്ധപ്പെടുത്താറുണ്ടന്നും സജിതമാടത്തിൽ പറഞ്ഞു .പക്ഷേ ഇത് സാമ്പത്തിക നേട്ടം മാത്രം ലക്ഷ്യമാക്കാതെ കലയുടെ പരിപോഷണത്തിന് ഉതകുന്നതായിരിക്കണമെന്നും അവർ പറഞ്ഞു.
സിനിമാ നയ രൂപീകരണത്തോടൊപ്പം അതിന്റെ നടപ്പാക്കലിലും പൂർണശ്രദ്ധയും സുതാര്യതയും വേണമെന്ന് സംവിധായിക മിനിഐ ജി പറഞ്ഞു. ട്രേയ്ഡ് യൂണിയൻ സംസ്കാരം മേഖലയിൽ കടന്നുവരേണ്ടതുണ്ടെന്നും സ്ത്രീകൾ, കുട്ടികൾ, ട്രാൻസ്ജെൻഡർ സമൂഹം തുടങ്ങിയ എല്ലാവരേയും കൂടുതലായി പരിഗണിക്കണമെന്നും അവർ പറഞ്ഞു.
സിനിമാ സൗഹൃദ സംസ്ഥാനത്തിനുള്ള പുരസ്കാരം നേടിയ സിക്കിമിന്റെ സിനിമാ നയത്തെ കേരളത്തിനും മാതൃകയാക്കാവുന്നതാണെന്ന് ഫിപ്രസി ജനറൽ സെക്രട്ടറി പ്രേമേന്ദ്ര മജുംദാർ പറഞ്ഞു.ചലച്ചിത്ര സംഘടനകൾ,അക്കാഡമി ,കെ എസ് എഫ് ഡി സി തുടങ്ങിയവരുടെ അഭിപ്രായങ്ങൾ സമന്വയിപ്പിച്ചാവണം സിനിമ നയം രൂപീകരിക്കേണ്ടതെന്ന് ചലച്ചിത്ര അക്കാഡമി സെക്രട്ടറി സി അജോയ് പറഞ്ഞു.
സംവിധായകൻ മണിലാൽ, വി കെ ജോസഫ് എന്നിവർ പങ്കെടുത്തു.
