തിരുവനന്തപുരം: നഷ്ടത്തിലോടുന്ന കെഎസ്ആർടിസി ബസ് സർവീസുകൾ നിർത്തുമെന്ന് ഗതാഗത വകുപ്പ് മന്ത്രി കെ ബി ഗണേഷ് കുമാർ. മന്ത്രിയായി ചുമതല ഏറ്റെടുത്ത ശേഷം തന്റെ വകുപ്പിൽ നടത്താനൊരുങ്ങുന്ന നടപടികളെ കുറിച്ച് വിശദീകരിക്കുന്നതിനിടെയാണ് ഗണേഷ് കുമാർ ഇക്കാര്യം വ്യക്തമാക്കിയത്.
നഷ്ടത്തിലോടുന്ന ബസ് സർവീസുകൾ നിർത്തുന്നതിടൊപ്പം മറ്റ് യാത്രാ സംവിധാനങ്ങൾ ഇല്ലാത്ത സ്ഥലങ്ങളിൽ സർവീസ് നിലനിർത്തുമെന്നും മന്ത്രി പറഞ്ഞു. കൊണ്ടുവരാൻ പോകുന്ന മാറ്റത്തിൽ ജനപ്രതിനിധികൾ പരിഭവിക്കരുതെന്നും അദ്ദേഹം കൂട്ടിച്ചേർത്തു. കെഎസ്ആർടിസി പ്രശനങ്ങൾ പരിഹരിക്കുമെന്നും വരുമാനത്തിനൊപ്പം കൂട്ടുക മാത്രം അല്ല ചെലവ് കുറക്കൽ ഉണ്ടാകണമെന്നും അദ്ദേഹം വ്യക്തമാക്കി.
കൂടാതെ മന്ത്രിയെന്ന നിലയിൽ അധികം പരിപാടികളിൽ പങ്കെടുക്കില്ല. എന്നാൽ പത്തനാപുരം മണ്ഡലത്തിലെ പരിപാടികളിൽ പങ്കെടുക്കുമെന്നും മന്ത്രി പറഞ്ഞു. തിങ്കൾ മുതൽ വ്യാഴം വരെ ഓഫീസിൽ ഉണ്ടാകുമെന്നും ക്യാബിനറ്റ് കഴിഞ്ഞ് വകുപ്പിലെ ഉദ്യോഗസ്ഥരെ കാണുമെന്നും അദ്ദേഹം വ്യക്തമാക്കി.
