തിരുവനന്തപുരം: സാഹിത്യകാരൻ എം ടി വാസുദേവൻ നായരുടെ പ്രസംഗത്തിൽ പ്രതികരണവുമായി മുതിർന്ന കോൺഗ്രസ് നേതാവ് രമേശ് ചെന്നിത്തല. കോഴിക്കോട് കെഎൽഎഫ് വേദിയിൽ മുഖ്യമന്ത്രി പിണറായി വിജയനെ ഇരുത്തിയായിരുന്നു എം ടി യുടെ പ്രസംഗം. എംടിയുടെ വാക്കുകൾ മുഖ്യമന്ത്രിയുടെ കണ്ണു തുറപ്പിക്കട്ടെയെന്നാണ് ചെന്നിത്തല പറയുന്നത്.
മാത്രമല്ലഈ വിമർശനം പിണറായിക്കും നരേന്ദ്ര മോദിക്കും ബാധകമാണെന്നും എംടി കാണിച്ച ആർജവം മറ്റ് സാംസ്കാരിക നായകർക്ക് മാതൃകയാവട്ടെയെന്നും ചെന്നിത്തല വ്യക്തമാക്കി. സ്തുതിപാഠകർക്ക് മാത്രം അവസരങ്ങൾ എന്നതാണ് ഇപ്പോഴത്തെയും അവസ്ഥയെന്നും അദ്ദേഹം ആരോപിച്ചു.
അധികാരം എന്നാൽ ജനസേവനത്തിന് കിട്ടുന്ന മെച്ചപ്പെട്ട ഒരവസരമാണെന്ന സിദ്ധാന്തത്തെ നമ്മൾ കുഴിവെട്ടി മൂടിയെന്നും ഭരണാധികാരികൾ എറിഞ്ഞു കൊടുക്കുന്ന ഔദാര്യത്തുണ്ടുകളല്ല സ്വാതന്ത്ര്യമെന്നും തെറ്റു പറ്റിയാൽ അത് സമ്മതിക്കുന്ന പതിവ് ഒരു മഹാരഥനും ഇവിടെയില്ലെന്നുമായിരുന്നു എം ടിയുടെ പ്രസംഗത്തിലെ പരാമർശം.
