പത്തനംതിട്ട: സംസ്ഥാന ബജറ്റിനെതിരെ ബിജെപി സംസ്ഥാന അധ്യക്ഷൻ കെ സുരേന്ദ്രൻ രംഗത്ത്. ധനമന്ത്രി കെ.എന്‍.ബാലഗോപാല്‍ അവതരിപ്പിച്ച സംസ്ഥാന ബജറ്റിൽ കേരളത്തിന്‍റെ വികസനത്തിനും ,വളർച്ചയ്ക്കും വേണ്ട ഒന്നുമില്ലെന്ന് കെ സുരേന്ദ്രൻ പറഞ്ഞു. ബജറ്റ് പുത്തിരിക്കണ്ടം പ്രസംഗമാണെന്നും പരാമർശങ്ങൾ പലതും വസ്തുക വിരുദ്ധമാണെന്നും അദ്ദേഹം ആരോപിച്ചു.
വെറും വാചക കസർത്ത് മാത്രമാണ് ബജറ്റിലുള്ളത്. തകർന്ന സമ്പത്ത് ഘടനയെ രക്ഷിക്കാൻ ഒരു മന്ത്രവും ബജറ്റിലില്ലെന്നും സുരേന്ദ്രൻ വ്യക്തമാക്കി. ക്ഷേമ പെൻഷൻ മാസങ്ങളായി മുടങ്ങി കിടക്കുന്നുവെന്നും സാധാരക്കാരെ സംബന്ധിച്ച് ഒരു പ്രതീക്ഷയും ബജറ്റ് നൽകുന്നില്ലെന്നും റബർ താങ്ങുവില പത്ത് രൂപ മാത്രം ഉയര്‍ത്തിയത് തട്ടിപ്പാണെന്നും സുരേന്ദ്രൻ കുറ്റപ്പെടുത്തി.
കൂടാതെ കേന്ദ്ര അവഗണനയെന്ന ആരോപണം തെറ്റാണ്. ഇത് സംബന്ധിച്ച് കേന്ദ്രസർക്കാർ സുപ്രീംകോടതിയിൽ സത്യവാങ്മൂലം നൽകിയിട്ടുണ്ടെന്നും അദ്ദേഹം പറഞ്ഞു.കിഫ്ബി തട്ടിപ്പെന്ന് വ്യക്തമാക്കുന്നതാണ് ധനമന്ത്രിയുടെ പ്രസംഗമെന്നും കേരളം കടമെടുത്തു ധൂർത്തടിക്കുകയാണെന്നും സുരേന്ദ്രൻ ആരോപിച്ചു.
