കഴക്കൂട്ടം: സ്ഥാനാർത്ഥി പ്രഖ്യാപനം വന്നതിന് പിന്നാലെ ഇടതുമുന്നണി സ്ഥാനാർഥി പന്ന്യൻ രവീന്ദ്രൻ ഇന്ന് കഴക്കൂട്ടം മണ്ഡലത്തിലെ വിവിധ പ്രദേശങ്ങളിൽ സൗഹൃദ സന്ദർശനം നടത്തി. പരിചയക്കാരായ വിവിധ വ്യക്തികളെയും വിവിധ സംഘടനാ നേതാക്കളെയും സാമൂഹ്യ പ്രവർത്തകരേയും കാണുകയും വോട്ട് അഭ്യർഥിക്കുകയും ചെയ്തു. കരിക്കകം ക്ഷേത്രത്തിലും ഉള്ളൂർ, മണ്ണന്തല ബിഷപ് ഹൗസുകളിലും പൗഡിക്കോണം പുതുകുന്നു ചർച്ചിലും ചേങ്കോട്ടുകോണം ശ്രീരാമദാസ ആശ്രമത്തിലും ചെമ്പഴന്തി ശ്രീനാരായണ ഗുരുകുലത്തിലും കോലത്തുകര ക്ഷേത്രത്തിലും കഴക്കൂട്ടം ജുമാമസ്‌ജിദിലും പന്ന്യൻ സന്ദർശനം നടത്തി.
സിപിഐ മണ്ഡലം സെക്രട്ടറി ചന്തവിള മധു, ജില്ലാ കൗൺസിൽ അംഗങ്ങളായ തുണ്ടത്തിൽ അജി,ചിത്രലേഖ എൽ ഡി എഫ് കൺവീനർ വി.ലെനിൻ സിപിഐഎം ജില്ലാ കമ്മിറ്റി അംഗം വി.ജയപ്രകാശ്, സിപിഐഎം ഏരിയ കമ്മിറ്റി സെക്രട്ടറി ഡി.രമേശൻ, തുടങ്ങി നിരവധി ഇടതുമുന്നണി നേതാക്കളും സ്ഥാനാർഥിയോടൊപ്പം ഉണ്ടായിരുന്നു.
