തിരുവനന്തപുരം: സംസ്ഥാനത്ത് വൈദ്യുതി ഉപയോഗത്തിൽ വൻ കുതിപ്പ്. ചൂട് വർധിച്ചതോടെ വൈദ്യുതി ഉപയോഗവും റെക്കോർഡ് ഇട്ടിരിക്കുകയാണ്. 107.76 ദശലക്ഷം യൂണിറ്റാണ് ഇന്നലത്തെ മൊത്ത വൈദ്യുതി ഉപഭോഗം. ഇത്തരത്തിൽ പോകുകയാണെങ്കിൽ നിയന്ത്രണം വേണ്ടി വരുമെന്നാണ് കെ എസ് ഇ ബി പറയുന്നത്.
കഴിഞ്ഞ ചൊവ്വാഴ്ചയാണ് റെക്കോർഡ് ഉപയോഗം രേഖപ്പെടുത്തിയത്. ഇതിനെ മറികടക്കുന്നതാണ് പുതിയ കണക്കുകൾ. 106.88 ദശലക്ഷം യൂണിറ്റ് വൈദ്യുതിയാണ് കഴിഞ്ഞ ചൊവ്വാഴ്ച സംസ്ഥാനത്ത് മൊത്തം ഉപയോഗിച്ചത്.
മാത്രമല്ല രാവിലത്തെ വൈദ്യുതി ആവശ്യകതയും പീക്ക് സമയ ആവശ്യകതയും റെക്കോര്ഡിട്ടു. വൈകുന്നേരം ആറ് മണി മുതൽ രാത്രി 11 മണി വരെയുള്ള സമയമാണ് പീക് ടൈം. ഇന്നലെ പീക് ടൈമിൽ 5359 മെഗാവാട്ട് വൈദ്യുതിയാണ് സംസ്ഥാനത്ത് ഉപയോഗിച്ചത്.
നിലവിൽ അമിത വിലയ്ക്ക് വൈദ്യുതി പവർ എക്സ്ചേഞ്ചിൽ നിന്ന് വാങ്ങിയാണ് കെഎസ്ഇബി വിതരണം തുടരുന്നത്. 300 മുതൽ 600 മെഗാവാട്ട് വരെ വൈദ്യുതിയാണ് ഉയർന്ന തുക നൽകി കെ എസ് ഇ ബി വാങ്ങുന്നത്.
