തിരുവനന്തപുരം: പത്തനംതിട്ടയിലെ ബി ജെ പി സ്ഥാനാർഥി അനിൽ ആന്റണിക്കെതിരെ വിമർശനവുമായി മുതിർന്ന കോൺഗ്രസ് നേതാവ് എ കെ ആന്റണി. പത്തനംതിട്ടയിൽ മകൻ തോൽക്കുമെന്നും അവിടെ ആന്റോ ആന്റണി ജയിക്കുമെന്നും മക്കളെ പറ്റി തന്നെ കൊണ്ട് അധികം പറയിപ്പിക്കരുതെന്നും എ കെ ആന്റണി പറഞ്ഞു.
കോൺഗ്രസ് നേതാക്കളുടെ മക്കൾ ബിജെപിക്കൊപ്പം ചേരുന്നത് തെറ്റാണ്. കുടുംബം വേറെ രാഷ്ട്രീയം വേറെ എന്നാണ് തുടക്കം മുതൽ തന്റെ നിലപാട്. തന്റെ മതം കോൺഗ്രസ് ആണ്. ലോക്സഭ ഇലക്ഷനിൽ ബി ജെ പി മൂന്നാം സ്ഥാനത്ത് പോകുമെന്നും അദ്ദേഹം വ്യക്തമാക്കി.
മാത്രമല്ല കേരളത്തിൽ ബിജെപിയുടെ സുവർണ കാലം കഴിഞ്ഞു. നരേന്ദ്രമോദിയുടെ നേതൃത്വത്തിൽ ബിജെപി വീണ്ടും അധികാരത്തിൽ വന്നാൽ ഭരണഘടനാമൂല്യങ്ങൾ അട്ടിമറിക്കപ്പെടുമെന്നും ഈ തിരഞ്ഞെടുപ്പ് കഴിഞ്ഞാൽ കേന്ദ്രത്തിൽ ബിജെപി ഭരണം അവസാനിപ്പിക്കണമെന്നും എ കെ ആന്റണി കൂട്ടിച്ചേർത്തു.
