തിരുവനന്തപുരം: പ്രശസ്ത നിര്മ്മാതാവ് ഗാന്ധിമതി ബാലന് അന്തരിച്ചു. 65 വയസായിരുന്നു. ഇന്ന് ഉച്ചയ്ക്ക് തിരുവനന്തപുരം കിംസ് ആശുപത്രിയിലായിരുന്നു അന്ത്യം. പഞ്ചവടിപ്പാലം, പത്താമുദയം, സുഖമോ ദേവി, നൊമ്പരത്തിപ്പൂവ്, മൂന്നാംപക്കം, ഈ തണുത്ത വെളുപ്പാൻ കാലത്ത്, ഇത്തിരി നേരം ഒത്തിരി കാര്യം, ആദാമിന്റെ വാരിയെല്ല്, മാളൂട്ടി തുടങ്ങി നിരവധി ക്ലാസിക് ചിത്രങ്ങളുടെ നിർമാതാവായിരുന്നു.
ദീർഘകാലമായി കരൾ സംബന്ധമായ ചികിത്സയിലായിരുന്നു. സംസ്കാരം നാളെ തിരുവനന്തപുരത്ത് നടക്കും. സംവിധായകൻ പദ്മരാജനൊപ്പമാണ് ഏറ്റവും കൂടുതൽ സിനിമകൾ ചെയ്തത്. നിർമാതാവിന് പുറമെ മികച്ച സംഘാടകൻ കൂടിയാണ് അദ്ദേഹം. 2015 നാഷനല് ഗെയിംസ് മുഖ്യ സംഘാടകന് ആയിരുന്നു ഗാന്ധിമതി ബാലൻ.
ബാലചന്ദ്രമേനോൻ സംവിധാനം ചെയ്ത ഇത്തിരി നേരം ഒത്തിരി കാര്യം എന്ന സിനിമയിലൂടെയാണ് ഗാന്ധിമതി ബാലൻ നിർമാണ മേഖലയിലേക്ക് എത്തിയത്. ചലച്ചിത്ര അക്കാദമി മുൻ വൈസ് ചെയർമാനും ആയിരുന്ന അദ്ദേഹം 30 ൽ പരം സിനിമകളുടെ നിർമാണവും വിതരണവും നടത്തി.
