തിരുവനന്തപുരം: സംസ്ഥാനത്ത് വോട്ടെടുപ്പിനിടെ മൂന്നുപേർ കുഴഞ്ഞ് വീണ് മരിച്ചതായി റിപ്പോർട്ട്. രണ്ടു വോട്ടർമാരും ഒരു ബൂത്ത് ഏജന്റുമാണ് മരിച്ചത്. പാലക്കാട്, മലപ്പുറം, കോഴിക്കോട് എന്നീ ജില്ലകളിലാണ് സംഭവം നടന്നത്.
കോഴിക്കോട് കുറ്റിച്ചിറ സ്കൂളിലെ ബൂത്തിൽ വച്ചാണ് ബൂത്ത് ഏജന്റ് മരിച്ചത്. എൽഡിഎഫ് ബൂത്ത് ഏജന്റ് ആയിരുന്നു ഇദ്ദേഹം. റിട്ട. കെഎസ്ഇബി ഉദ്യോഗസ്ഥൻ അനീസ് അഹമ്മദാണ് മരിച്ചത്. രാവിലെ പോളിംഗ് സ്റ്റേഷനിൽ കുഴഞ്ഞുവീണ ഇദ്ദേഹത്തെ ഉടൻ ബീച്ച് ആശുപത്രിയിലെത്തിച്ചിരുന്നു. എന്നാൽ ജീവന് രക്ഷിക്കാനായില്ല.
പാലക്കാട് ഒറ്റപ്പാലത്താണ് ഒരു വോട്ടർ കുഴഞ്ഞു വീണ് അരിച്ചത്. ഒറ്റപ്പാലം ചുനങ്ങാട് വോട്ട് ചെയ്തു മടങ്ങിയ വയോധികനാണ് മരിച്ചത്. ഒറ്റപ്പാലത്ത് വാണിവിലാസിനി സ്വദേശി ചന്ദ്രനാണ് (68) മരിച്ചത്. രാവിലെ 7:30 ഓടെയാണ് സംഭവം നടന്നത്. ഉടനെ ഒറ്റപ്പാലം താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.
മലപ്പുറത്ത് വോട്ട് ചെയ്തു മടങ്ങിയ വയോധികനാണ് കുഴഞ്ഞു വീണു മരിച്ചത്. തിരൂർ നിറമെരുതൂർ സ്വദേശി ആലുക്കാനകത്ത് സിദ്ധീഖ് മൗലവിയാണ് മരിച്ചത്.
