കിളിമാനൂര്‍: ഹയര്‍ സെക്കന്‍ഡറി പരീക്ഷയില്‍ ഫുള്‍ മാര്‍ക്ക് നേടി കിളിമാനൂരിന്റെ അഭിമാനമായി മൂന്ന് മിടുക്കികള്‍. കിളിമാനൂര്‍ ആര്‍.ആര്‍. വി ഗേള്‍സ് ഹയര്‍ സെക്കന്‍ഡറി സ്‌കൂളിലെ വിദ്യാര്‍ത്ഥികളാണ് മൂവരും. ഐശ്വര്യ നായര്‍ എ.ബി, ദൃശ്യ.എ.എസ് എന്നിവര്‍ ബയോളജി സയന്‍സ് എടുത്ത് പഠിച്ച് മുഴുവന്‍ മാര്‍ക്കും കരസ്ഥമാക്കിയപ്പോള്‍ റാണി ജാസ്മിന്‍ കമ്പ്യൂട്ടര്‍ സയന്‍സ് എടുത്താണ് 1200 ല്‍ 1200 മാര്‍ക്കും നേടിയത്.
റാണി ജാസ്മിന്‍ നഗരൂരില്‍ ഹാര്‍ഡ് വെയര്‍ ബിസിനസ് നടത്തുന്ന അന്‍സാരിയുടെയും ഷീജയുടെയും മകളാണ് .കമ്പ്യൂട്ടര്‍ സയന്‍സില്‍ എഞ്ചിനിയര്‍ ആകാനാണ് താല്പര്യം. വാമനപുരം സ്വദേശിയായ മെഡിക്കല്‍ സ്റ്റോര്‍ ഉടമ അജയകുമാറിന്റെയും ഫാര്‍മസിസ്റ്റ് ആയി ഭര്‍ത്താവിനെ മെഡിക്കല്‍ സ്റ്റോറില്‍ സഹായിക്കുന്ന സരിതയുടെയും മകളാണ് ദൃശ്യ. ഡോക്ടര്‍ ആകാനാണ് ദൃശ്യ ആഗ്രഹിക്കുന്നത് .
സെക്രട്ടറിയേറ്റ് അസിസ്റ്റന്റ് ആയ ആര്‍.എസ് ബിന്ദുവിന്റെയും കൊടുവഴന്നൂര്‍ സ്‌കൂളില്‍ അദ്ധ്യാപകനായ കെ.അനില്‍ കുമാറിന്റെയും മകളാണ് കൊടുവഴന്നൂര്‍ സ്വദേശിയായ ഐശ്വര്യ. ദൃശ്യയും, ഐശ്വര്യയും നീറ്റ് എഴുതിയിട്ടുണ്ട്. ഐശ്വര്യക്ക് സിവില്‍ സര്‍വിസിനോടാണ് താല്പര്യം.
