തിരുവനന്തപുരം: ബാർ കോഴ ആരോപണത്തിൽ പ്രതികരണവുമായി കെപിസിസി പ്രസിഡന്റ് കെ സുധാകരന്. വമ്പന് അഴിമതി നടത്തിയാണ് പുതിയ മദ്യംനയം നടപ്പിലാക്കുന്നതെന്ന് കെ സുധാകരൻ പറഞ്ഞു. മാത്രമല്ല ആരോപണത്തിൽ എക്സൈസ് വകുപ്പ് മന്ത്രി എം.ബി. രാജേഷ് രാജി വെക്കണമെന്ന് കെ. സുധാകരന് ആവശ്യപ്പെട്ടു.
2.5ലക്ഷം രൂപ വച്ചാണ് സംസ്ഥാനത്തെ 900 ബാറുകളില്നിന്ന് ഇപ്പോള് പിരിക്കുന്നത്. തെരഞ്ഞെടുപ്പിനു മുമ്പും വലിയൊരു തുക സമാഹരിച്ചതായി കേള്ക്കുന്നുവെന്നും കുടിശികയാണ് ഇപ്പോള് പിരിക്കുന്നതെന്നും സുധാകരൻ ആരോപിച്ചു.
മുഖ്യമന്ത്രി പിണറായി വിജയന്റെ പുതിയ മദ്യനയം കേരളത്തെ മദ്യത്തില് മുക്കും. മാത്രമല്ല കേരളത്തെ മദ്യവിമുക്തമാക്കുമെന്ന് വാഗ്ദാനം ചെയ്താണ് പിണറായി സര്ക്കാര് അധികാരത്തിലേറിയത്. ഇപ്പോൾ അതെല്ലാം കോഴയ്ക്കുവേണ്ടി പിണറായി വെള്ളത്തില് മുക്കിയെന്നും യുവതലമുറയെ മദ്യത്തിലേക്ക് വലിച്ചെറിയുന്ന ഏറ്റവും ഭയാനകമായ തീരുമാനമാണ് സർക്കാറിന്റെ ഭാഗത്ത് നിന്നും ഉണ്ടാകുന്നതെന്നും കെ സുധാകരൻ പറഞ്ഞു.
