എറണാകുളം: മഞ്ഞുമ്മൽ ബോയ്സ് സിനിമ നിർമാതാക്കൾക്കെതിരെ പൊലീസിന്റെ അന്വേഷണ റിപ്പോർട്ട്. സാമ്പത്തിക തട്ടിപ്പ് കേസിലാണ് പോലീസ് റിപ്പോർട്ട് സമർപ്പിച്ചത്. സിനിമാ നിര്മാതാക്കള് സാമ്പത്തിക തട്ടിപ്പ് നടത്തിയെന്നും പറവ ഫിലിംസ് നടത്തിയത് കരുതിക്കൂട്ടിയുള്ള ചതിയാണെന്നുമാണ് പൊലീസ് റിപ്പോര്ട്ടിൽ പരാമർശിച്ചിരിക്കുന്നത്. ഹൈക്കോടതിയിലാണ് പോലീസ് അന്വേഷണ റിപ്പോർട്ട് സമർപ്പിച്ചത്.
22 കോടി രൂപ സിനിമയ്ക്കായി ചെലവായെന്നാണ് നിർമ്മാതാക്കൾ പറഞ്ഞത്. എന്നാൽ റിപ്പോർട്ടിൽ പറയുന്നത് 18.65 കോടി രൂപ മാത്രമാണ് നിർമ്മാണ ചെലവെന്നാണ്. മാത്രമല്ല ഷൂട്ടിങ് തുടങ്ങുന്നതിന് മുൻപേ ആദ്യ ഷെഡ്യൂൾ പൂർത്തിയായെന്ന് പരാതിക്കാരനെ വിശ്വസിപ്പിച്ചുവെന്നും റിപ്പോർട്ടിൽ പറയുന്നു.
അരൂര് സ്വദേശിയായ സിറാജ് വലിയത്തറ ഹമീദാണ് മഞ്ഞുമ്മല് ബോയ്സ് നിര്മാതാക്കള്ക്കെതിരെ പരാതി നൽകിയത്. ഏഴ് കോടി രൂപയാണ് പരാതിക്കാരനായ സിറാജിൽ നിന്ന് ഇവർ വാങ്ങിയത്. വാങ്ങിയ പണത്തിൻറെ ഒരു ഭാഗം പോലും പരാതിക്കാരന് പറവ ഫിലിം കമ്പനി തിരികെ നൽകിയിട്ടില്ലെന്നും പൊലീസ് പറയുന്നു.
