തിരുവനന്തപുരം: കെഎസ്ആർടിസിക്ക് 32 സീറ്റുകളുള്ള മിനി ബസ്സുകൾ എത്തി. എൽ പി 712 റ്റാറ്റാ നോൺ ഏസി മിനി ബസുകളാണ് എത്തിയത്. ബസുകളുടെ ട്രയൽ റൺ ഗതാഗത വകുപ്പ് മന്ത്രി കെ ബി ഗണേഷ് കുമാർ നടത്തി. വലിയ ബസ്സുകൾ ഉപയോഗിച്ച് സർവീസ് നടത്താൻ സാധിക്കാത്ത ഇടുങ്ങിയ റോഡുകളിലെ സർവ്വീസിനു ഏറെ ഗുണം ചെയ്യുന്നതാണ് ഈ മിനി ബസുകൾ.
മാത്രമല്ല കെഎസ്ആർടിസിയുടെ ഡീസൽ ഇനത്തിലുള്ള പ്രവർത്തന ചെലവ് കുറയ്ക്കുന്നതിനും, ജനസാന്ദ്രത കുറഞ്ഞ മേഖലയിലേക്ക് സർവീസുകൾ വ്യാപിപ്പിക്കുന്നതിനും ലാസ്റ്റ് മൈൽ കണക്ടിവിറ്റി ഉറപ്പാക്കുന്നതിനും 32 സീറ്റുകളുള്ള ഈ മിനി ബസ്സുകൾ സഹായിക്കും.
ഈ ബസ് ഉപയോഗിച്ച് പരീക്ഷണാടിസ്ഥാനത്തിൽ പത്തനാപുരം യൂണിറ്റിൽ നിന്നും കുര മൈലം വഴി കൊട്ടാരക്കരയിലേയ്ക്ക് നിലവിലുള്ള ഓർഡിനറി ബസ്സിന് പകരം നൽകി സർവ്വീസ് നടത്തുന്നതാണ്. തുടർന്ന് കാട്ടാക്കട പാലോട് എന്നിവിടങ്ങളിലെ ഗാട്ട് സെക്ടറിലും തിരുവനന്തപുരം സിറ്റിയിലും പരീക്ഷണ ഓട്ടം നടത്തും.
