കോഴിക്കോട്: മംഗളൂരിൽ മണ്ണിടിഞ്ഞ് വീണ് കാണാതായ കോഴിക്കോട് സ്വദേശിയായ ലോറി ഡ്രൈവർ അർജുനായുള്ള തിരച്ചിൽ തുടരുന്നു. രക്ഷാപ്രവർത്തനം രാത്രി 10 മണി വരെ തുടരുമെന്നാണ് പുറത്തുവരുന്ന വിവരം. രണ്ടാം ഘട്ട റഡാർ ഉപയോഗിച്ചുള്ള തിരച്ചിലാണ് ഇപ്പോൾ നടക്കുന്നത്.
പരിശോധനയിൽ ട്രക്ക് ഉണ്ടെന്ന് കരുതുന്ന പ്രദേശം കണ്ടെത്തിയെന്നാണ് സംഘം അറിയിക്കുന്നത്. മണ്ണിനടിയിൽ ഉണ്ടാവാൻ 60 ശതമാനം സാധ്യത ഉണ്ടെന്നാണ് അധികൃതർ പറയുന്നത്. കണ്ടെത്തിയാൽ ഉടൻ മണിപ്പാൽ മെഡിക്കൽ കോളേജിലെത്തിക്കാൻ ആംബുലൻസുകളും തയ്യാറാണ്. വൈകാതെ തന്നെ അർജുൻ കണ്ടെത്താനാകുമെന്ന് തന്നെയാണ് പ്രതീക്ഷ.
സിഗ്നൽ ലഭിച്ച ഭാഗത്ത്‌ കൂടുതൽ മണ്ണ് എടുത്ത് പരിശോധന നടത്തുകയാണ്. രക്ഷാപ്രവർത്തനം ഇപ്പോൾ കൂടുതൽ വേഗത്തിലാക്കിയിരിക്കുകയാണ്. സിഗ്നൽ ലഭിച്ച ഈ സ്ഥലം മാർക്ക് ചെയ്താണ് മണ്ണെടുത്ത് മാറ്റുന്നത്. അതേസമയം രക്ഷാപ്രവർത്തനത്തിന് വെല്ലുവിളി ഉയർത്തി വീണ്ടും ശക്താമായ മഴ തുടരുകയാണ്.
