തിരുവനന്തപുരം: തിരുവനന്തപുരത്ത് അമീബിക് മസ്തിഷ്ക ജ്വരമെന്ന് സംശയം. സമാന ലക്ഷണങ്ങളോടെ യുവാക്കൾ ചികിത്സയിൽ. മാത്രമല്ല കഴിഞ്ഞ മാസം 23ന് മെഡിക്കൽ കോളേജ് ആശുപത്രിയിൽ മരിച്ച യുവാവിന് അമീബിക്ക് മസ്തിഷ്ക ജ്വരമെന്നാണ് സംശയിക്കുന്നത്.
നെയ്യാറ്റിൻകര നെല്ലിമൂട് സ്വദേശികളായ രണ്ടു പേരാണ് രോഗ ലക്ഷണങ്ങളുമായി മെഡിക്കൽ കോളേജ് ആശുപത്രിയിൽ ചികിത്സയിൽ കഴിയുന്നത്. ഇവരുടെ സാമ്പിളുകൾ ഇന്ന് പരിശോധനയ്ക്ക് അയയ്ക്കും. അതെ സമയം മെക്രോബയോളജി ലാബിൽ നടത്തിയ പരിശോധനയിലാണ് തലച്ചോറിൽ അമീബയുടെ വകഭേദമായ നീഗ്ലേറിയയുടെ സാന്നിദ്ധ്യം കണ്ടെത്തിയത്.
കഴിഞ്ഞ മാസം മരിച്ച കണ്ണറവിള, അനുലാൽ ഭവനിൽ അഖിൽ(27) കണ്ണറവിളയ്ക്കു സമീപത്തെ കാവിൻ കുളത്തിൽ കുളിച്ചിരുന്നു. ഇതിനു പിന്നാലെയാണ് രോഗം ബാധിച്ച് മരിച്ചത്. അഖിലിന് പിന്നാലെ മറ്റു രണ്ടു യുവാക്കൾ കൂടി ഇതേ കുളത്തിൽ കുളിച്ചിരുന്നു. അതിനു ശേഷമാണ് ഇവർക്കും രോഗലക്ഷണങ്ങൾ കണ്ടത്. ഇതേ തുടർന്ന് കുളം ആരോഗ്യവകുപ്പ് സീൽ ചെയ്തു. ചികിത്സയിലുള്ള രണ്ടുപേരുടേയും ആരോഗ്യനില തൃപ്തികരമാണെന്ന് അധികൃതർ അറിയിച്ചു.
