തിരുവനന്തപുരം: ജസ്റ്റിസ് ഹേമ കമ്മിറ്റി റിപ്പോർട്ട് പുറത്തുവന്നതിന് പിന്നാലെ സംവിധായൻ രഞ്ജിത്തിനെതിരെ ആരോപണമുന്നയിച്ച് ബംഗാൾ നടി. ബംഗാളി നടി ശ്രീലേഖ മിത്രയാണ് സംവിധായകനും സംസ്ഥാന ചലചിത്ര അക്കാദമി ചെയർമാനുമായ രഞ്ജിത്തിനെതിരെ ആരോപണം ഉന്നയിച്ചത്. ഇതേ തുടർന്ന് നിരവധി പേർ അനുകൂലിച്ചും പ്രതികൂലിച്ചും രംഗത്തെത്തിയിരുന്നു. രഞ്ജിത്ത് ഇനി സംസ്ഥാന ചലചിത്ര അക്കാദമി ചെയർമാൻ സ്ഥാനത്ത് തുടരാൻ യോഗ്യനല്ലെന്നും പ്രസ്താവനകൾ ഉണ്ടായിരുന്നു.
ഇതേ തുടർന്ന് സംഭവത്തിൽ പ്രതികരണവുമായി രംഗത്തെത്തിരിക്കുകയാണ് സാംസ്കാരിക വകുപ്പ് മന്ത്രി സജി ചെറിയാൻ. ആക്ഷേപത്തിൽ കേസെടുക്കാനാകില്ലെന്നും പരാതി ലഭിച്ചാൽ നടപടിയെടുക്കുമെന്നുമെന്നുമാണ് മന്ത്രി പറയുന്നത്. ഇന്ത്യ കണ്ട പ്രഗത്ഭനായ കലാകാരനാണ് രഞ്ജിത്ത്. ആരോപണങ്ങളിൽ രഞ്ജിത് മറുപടി പറഞ്ഞിട്ടുണ്ട്. കുറ്റം ചെയ്തിട്ടുണ്ടെങ്കിൽ നടപടിയുണ്ടാകുമെന്നും കേവലം ഊഹാപോഹത്തിന്റെ അടിസ്ഥാനത്തിൽ നടപടിയെടുക്കാനാവില്ലെന്നും മന്ത്രി വ്യക്തമാക്കി.
